Tuesday, April 26, 2016

சிலம்பாட்டம் விளையாடலாமா?

video

தமிழர்களின் வீர விளையாட்டான சிலம்பாட்டத்தை கடந்த ஒரு மாத காலமாக கற்றுக்கொண்டு வருகிறேன். பால பாடத்தில் இருக்கும்போதே பெரிய வித்தையை மக்கள் முன் காட்டவேண்டிய கட்டாயம் நேற்றுமுன்தினம் எங்கள் குழுவுக்கு ஏற்பட்டது. தாம்பரம் சானடோரியம் அம்மன் கோவில் திருவிழாவில் நேற்று முன்தினம் இரவு 8 மணி முதல் நள்ளிரவு 12:30 வரை திருவீதி உலா நடந்தது. அதில் எங்கள் சிலம்பாட்டக் குழுவின் விளையாட்டும் இடம்பெற்றது.

அதில் நான் ஆடிய தீப்பந்த விளையாட்டு இது... இந்த நிகழ்வு நடந்த அன்று காலைதான் முதன் முதலாக இதற்கு பயிற்சி எடுத்தேன்... அன்று இரவே இதை மக்கள் முன்பு அரங்கேற்றினேன்... எல்லாப் புகழும் எனது சிலம்பாட்ட வாத்தியாருக்கே...




Tuesday, March 22, 2016

'ஆசிரியர் வைபவம்' நிகழ்ச்சியில் அசத்திய அரசுப்பள்ளி ஆசிரியர்கள்!


இரு தினங்களுக்கு முன்பு, அதாவது சென்ற ஞாயிற்றுக்கிழமை திருப்பத்தூர் தூய நெஞ்சக் கல்லூரியில் ‘ஆசிரியர் வைபவம்’ நிகழ்ச்சி நடைபெற்றது. முழுக்க முழுக்க அரசுப்பள்ளி ஆசிரியர்கள் தங்களது திறனை வெளிக்கொணரும் நிகழ்ச்சியாக இது அமைந்தது.

இந்த நிகழ்ச்சிக்கு கௌரவ விருந்தினனாக எனை அழைத்திருந்தனர். அக்கல்லூரியின் கரேஞா அரங்கத்தில் இந்த நிகழ்ச்சி காலை 10 மணிக்கு தொடங்கியது.

காலை தொடங்கிய இந்த நிகழ்ச்சி மாலை 5.40க்கு நிறைவடைந்தது. 20 அரசுப்பள்ளி ஆசிரியர்களின் தனித்திறமைகள் முதன்முறையாக அரங்கேற்றம் கண்டன. புகை நமைக்கு பகை என்ற தலைப்பில் ஒரு ஆசிரியர் உரை நிகழ்த்தினார். அது உரை என்பதை விட ‘தனி நடிப்பு’ மூலம் செய்து அசத்தினார்.
                                                                      தனிநடிப்பு ஆசிரியருக்கு பாராட்டு

அடுத்து வந்த ஆசிரியை ‘ராதை மனதில்… ராதை மனதில் என்ன ரகசியமோ…’’ என்ற பாடலுக்கு மனதை ஈர்க்கும் வகையில் நடமாடி கைத்தட்டல்கள் பெற்றார். அடுத்து வந்த ஆசிரியை ஆங்கிலத்தில் உரை நிகழ்த்தினார். ஒரு ஆசிரியை நளவெண்பா பாடலை தானே பாடி, இசையமைத்து குறுந்தகடாக அங்கு வெளியிட்டார்.


அரசுப்பள்ளி மாணவர்கள் குழு ஒன்று அனாசயமாக ஆங்கிலத்தில் நல்ல பழக்கவழக்கங்களை நாடகமாய் நடித்துக் காட்டி கைத்தட்டல்களை அள்ளியது. அசந்து போனேன். மற்றொரு அரசுப்பள்ளி மாணவிகள் குழு, தாய்லாந்து மங்கைகளைப் போல் ஆடை, அலங்காரம் செய்தபடி, ‘வந்தே மாதரம்’ பாடலுக்கு நடமாடி உள்ளத்தை கொள்ளை கொண்டனர்.

அவரை அடுத்து வந்த ஆசிரியர் மிமிக்ரி மூலம் தேசபக்தி கதையை செப்புவித்தார். அடுத்து அரங்கேறிய ஆசிரியை தமிழக நாட்டுப்புறக்கலைகளில் ஒன்றான கரகாட்டத்தை ஆடினார். அவர் ஆடியது மட்டுமின்றி அரங்கத்தில் உள்ளோரையும் ஆட்டம் போட வைத்தார் என்றே சொல்ல வேண்டும்.

                                         மிமிக்ரி மூலம் தேசபக்தி கதை சொன்ன ஆசிரியருக்கு பாராட்டு

அடுத்த வந்த ஆசிரியர் தான் இயக்கிய திகில் குறும்படத்தை திரையிட்டார். ஒலிக்கலவையும், கேமராவும் மிக நேர்த்தியாக இருந்தது. பின்னணி இசை பயமுறுத்திற்று. அட்டகாசமான திகில் குறும்படம் அது.


52 வயது நிரம்பிய அரசுப்பள்ளி ஆசிரியை ஒருவர் ‘சின்னக்குயில் பாடும் பாட்டு கேக்குதா…’ பாடலை தாள லயத்தோடு, ஸ்ருதி பிசகாமல் பாடினார். பாராட்டாமல் இருக்க முடியவில்லை அவரை… அவ்வளவு நேர்த்தி…

நான் ஒவ்வொரு ஆசிரியர்களும் தங்கள் திறனைக் காட்டியபோது, அவர்களை உற்சாகப்படுத்தி பேசியதைக் கேட்டு, அங்கு பார்வையாளராக வந்திருந்த ஆசிரியை, மேடையேறி மூன்று பாடல்களைப் பாடிக் காட்டி பரவசம் கொள்ளச் செய்தார்.

அடுத்து வந்த ஆசிரியர் பியானோ வாசித்தார். அப்துல் கலாம் குறித்து  எழுதி, இசையமைத்து, ஒளிப்பதிவு செய்த வீடியோவை திரையிடச் செய்தார். அடுத்த அந்த பாடலுக்கு மேடையில் நடனமாட, கீழிருந்த ஒரு மாணவி அவரோடு சேர்ந்து துள்ளாட்டம் போட்டது பார்வையாளர்களான எங்களை பரவசப்படுத்தியது. மாணவர்களே எழுதிய கதைப்புத்தகம் ஒன்று, அரசுப்பள்ளி ஆசிரியர்களின் முயற்சியால் அங்கு வெளியிட்டப்பட்டது.

அரசுப்பள்ளி ஆசிரியைகள் குழு ஒன்று, வில்லுப்பாட்டினை அரங்கேற்றியது. அரசுப்பள்ளிகளின் முக்கியத்துவத்தை சினிமா பாடல்களின் மெட்டுகளில் வடிவமைத்து பாடி அசத்தினர்.

                                                             குறுந்தகடு வெளியீடு
எனது கையால் ‘பலூன்’ என்ற குறும்படம் வெளியிட வைத்தனர். ரைம்ஸ் பாடல் குறித்த சிடி ஒன்றையும் எனது கையால் வெளியிட வைத்தார்கள். மகிழ்வாக இருந்தது.

ஒரு ஆசிரியர் சோப்பு, சாக்பீஸ் ஆகியவற்றில் பல்வேறு சிற்பங்களும் முட்டை ஒடுகளால் ஓவியங்களும் வரைந்து காட்டி அசத்தினார். ஒரு ஆசிரியர் பறவைகளின் குரல்களை எழுப்பிக்காட்டினார்.
இன்னும் மறக்கவியலா நிகழ்வினை அந்த நிகழ்ச்சி உள்ளடக்கியிருந்தது. விழாவின் முடிவில் பங்குபெற்ற அத்தனை அரசுப்பள்ளி ஆசிரியர்களுக்கும் கேடயம், சான்றிதழ் வழங்கி கௌரவித்தேன். அவர்களது மகிழ்ச்சியில் நானும் மகிழ்ந்து நெகிழ்ந்து போனேன்!

                                                            நளவெண்பா பாடிய ஆசிரியைக்கு பாராட்டு

வில்லுப்பாட்டு பாடிய ஆசிரியை குழுவினர் என்னோடு குழுவாக படம் எடுத்துக் கொண்டது மட்டுமின்றி, தங்களது பள்ளி மாணவர்களைப் பற்றி பேசினர், அவர்கள் பள்ளிக்கு வருமாறும் அழைப்பு விடுத்தனர்.


அரசுப்பள்ளி ஆசிரியர்களிடம் இவ்வளவு திறமைகள் புதைந்து கிடக்கின்றனவா என்று உண்மையிலேயே அதிசயித்துப் போனேன். வாழ்த்துகள் அரசுப்பள்ளி ஆசிரியர்களே... உங்கள் அபரிமிதமான திறன்களுக்கு எனது மனமார்ந்த பாராட்டுகள்! இதை மாநில அளவில் ஏன் நாம் நடத்தக்கூடாது என்ற எண்ணத்தினை இந்த நிகழ்ச்சி என்னுள் ஏற்படுத்தியது. விழாவின் இறுதியில் குழுப்படம் எடுத்தனர்.



இந்த நிகழ்ச்சியை அரசுப்பள்ளி ஆசிரியர்களுக்காக திருப்பத்தூர் ஜேஸிஸ் சங்கம் நடத்தியது. அரசுப்பள்ளி ஆசிரியர்களான சுமித்ரா, பாண்டியன் உள்ளிட்டோர் இந்நிகழ்வை வெற்றிகரமாக நடத்திக்காட்டினர். அவர்களுக்கு இந்நேரத்தில் எனது நன்றியை தெரிவித்துக் கொள்கிறேன். தம்பி கிரண், ஜோலார்பேட்டை ரயில்நிலைய மாஸ்டர் வெங்கடாசலம், இந்நிகழ்ச்சிக்கு தொகுப்பாளராக இருந்த அன்புத் தோழர் சிகரம் சதீஷ் ஆகியோரை மறக்கவே இயலாது.

போய் வருகிறேன் திருப்பதூரே… என்றபடி அங்கிருந்து கிளம்ப மனமின்றி கிளம்பி வந்தேன். இனிமையான அனுபவம் அது..!




Friday, March 18, 2016

திருப்பத்தூரில் நடைபெறும் 'ஆசிரியர் வைபவம்' நிகழ்ச்சி

வணக்கம் அன்பு நெஞ்சங்களே...

பத்திரிகை உலகில் அடி எடுத்து வைத்து 15 ஆண்டுகள் உருண்டோடிவிட்டன. சச்சின் தெண்டுல்கர் முதல் சாமன்யன் வரையிலும், திரை உலக பிரபலங்கள் முதல் திடலில் திரியும் சிறுவன் வரையிலும், அரசு அதிகாரிகள் முதல் அரசுப் பள்ளி ஆசிரியர்கள் வரை பேட்டி எடுத்திருக்கிறேன். பலவித கட்டுரைகளை எழுதியிருக்கிறேன்.

இத்தனை ஆண்டுகால வளர்ச்சிக்குப் பிறகு... சென்ற ஆண்டின் இறுதியில் பொள்ளாச்சி மகாலிங்கம் பொறியியல் கல்லூரியில் நடைபெற்ற சிற்றிதழ் குறித்த பயிலரங்கில் சிறப்பு அழைப்பாளராக, பயிற்சியாளராக கலந்து கொண்டேன். மேடை ஏறி, நான் கற்றதை மற்றவருக்கும் கற்பிக்கும் வாய்ப்பு அது... கற்பித்து மகிழ்ந்தேன். என் கல்வியின் கற்பினைக் கண்டு மகிழ்ந்தேன்...

நாளை மறுதினம் திருப்பத்தூர் தூய நெஞ்சக் கலை அறிவியல் கல்லூரியில் 'ஆசிரியர் வைபவம்' என்ற நிகழ்ச்சி நடைபெற இருக்கிறது. 40 அரசுப்பள்ளி ஆசிரியர்கள், பலநூறு பார்வையாளர்கள் முன்பு தங்களது தனித்திறமைகளை மேடையேற்ற இருக்கிறார்கள்.  அத்தகைய நிகழ்வில் நானும் ஒரு கௌரவ அழைப்பாளராக கலந்து கொள்ள அழைக்கப்பட்டிருக்கிறேன். இதற்கு முழுமுதற் காரணமாய் இருக்கும் ஆசிரியை சுமித்ரா அவர்களுக்கு எனது வாழ்த்துகளையும் பாராட்டுகளையும் சொல்லிக் கொள்கிறேன். எனை இந்த அளவிற்கு வளர்த்து விட்ட எமது ஆசிரியப் பெருமக்கள், எனது பெற்றோர், எனது குடும்பத்தினர், எனது நண்பர்களாகிய நீங்கள் உள்ளிட்ட அனைவருக்கும் பங்கிருக்கிறது.

திருப்பத்தூருக்கு உங்களனைவரையும் என் சார்பில் அழைக்கிறேன்..!








Monday, March 07, 2016

உலகின் தற்போதைய பெண் தலைவர்கள்! - மகளிர் தின சிறப்புப் பதிவு!



 
உலகில் மொத்தம் 205-க்கும் மேற்பட்ட நாடுகள் இருக்கின்றன என்று ஒரு புள்ளி விபரம் சொல்கிறது. இத்தனை நாடுகளில் எத்தனை பெண்கள் அதிபராகவோ, பிரதமராகவோ இருக்கிறார்கள் என்று தேடிப்பார்த்தால் 16 பேர் காணக்கிடைத்தார்கள். உலகில் சரிபாதி பெண்கள்தான். 205 நாடுகளில் 16 நாடுகளில் மட்டுமே பெண்கள் அதிகாரத்தில் இருக்கிறார்கள். அதாவது, உலகிலுள்ள நாடுகளின் அதிபர்கள், பிரதமர்கள் எண்ணைக்கையை கணக்கிட்டால் ஆறரை சதவீதம் மட்டுமே பெண்கள் தலைமைப் பொறுப்பை வகிக்கிறார்கள். மீதம் 93 சதவீதம் பேர் ஆண்களாகவே இருக்கிறார்கள்… இனி அந்த பதினாறு பெண் தலைவர்களைப் பார்க்கலாம்…

ஏஞ்சலா மெர்கல் (Anjelo merkel) அதிபர், ஜெர்மனி
ஐரோப்பிய நாடுகளில் ஒன்றான ஜெர்மனியின் அதிபராக பதவி வகித்து வருபவர் ஏஞ்சலா மெர்கல். இவர், இந்நாட்டின் தொடர்ந்து மூன்றாவது முறையாக பிரதமர் பதவியை வகித்து வருகிறார். கிறிஸ்டியன் ஜனநாயகக் கட்சியைச் சேர்ந்த இவர், முன்னதாக, 2005, 2009 ஆம் ஆண்டுகளில் நடைபெற்ற தேர்தலில் வெற்றி பெற்று பிரதமராகப் பதவி வகித்திருக்கிறார். 2013-ஆம் ஆண்டுக்கான இந்திரா காந்தி அமைதிப் பரிசு பெற்றவர் இவர். அமெரிக்காவில் இருந்து வெளியாகும் டைம் இதழின் 2015 ஆம் ஆண்டின் சிறந்த மனிதராக தேர்வு செய்யப்படவர்.

எல்லன் ஜான் ஸன் சர்லீப், (Ellen Johnson Sirleaf) அதிபர், லைபீரியா
மேற்கு ஆப்பிரிக்க நாடான லைபீரியாவின் முதல் பெண் அதிபராக 2005-இல் தேர்ந் தெடுக்கப்பட்டவர் எல்லன் ஜான் ஸன் சர்லீப், ஹார்வர்டு பல்கலைக்கழகத்தில் பொருளாதாரத் துறையில் பட்டம் பெற்றவர். 2011-ஆம் ஆண்டு அமைதிக்கான நோபல் பரிசினை பகிர்ந்து கொண்டவர். 2012-ஆம் ஆண்டுக்கான இந்திராகாந்தி அமைதிப் பரிசினை வென்றவர். இந்நாட்டின் 42-வது அதிபராக தற்போது பொறுப்பு வகித்து வருகிறார்.

டாலியா கிரிபவுஸ்கைடே, (Dalia Grybauskaitė) அதிபர், லித்துவேனியா
வட ஐரோப்பா பகுதியில் உள்ள நாடு லித்துவேனியா. இந்த நாட்டின் முதல் பெண் அதிபராக கடந்த 2009-ஆம் ஆண்டு தேர்ந்தெடுக்கப்பட்டார். இன்று வரை அதிபராக இருக்கும் இவர், அந்நாட்டின் வெளியுறவுத் துறை மற்றும் நிதித்துறை அமைச்சராகவும் பணியாற்றி இருக்கிறார். அந்நாட்டினரால் ‘இரும்புப் பெண்மணி’ என்று அழைக்கப்படும் இவர் கராத்தேவில் ‘கறுப்பு பட்டை’ பெற்றவர்

தில்மா ரூசெப், (Dilma Rousseff) அதிபர், பிரேசில்
தென் அமெரிக்க நாடுகளில் ஒன்றான பிரேசிலின் 36-வது அதிபராக பதவி வகித்து வருகிறார் தில்மா ரூசெப். இந்நாட்டின் முதல் பெண் அதிபரும் இவர்தான். 2011-ஆம் ஆண்டு முதல் அதிபராக பதவி வகித்து வரும் இவர், லூயிஸ் இனாசியோ லுலா டா சில்வா மாகணத்தின் தலைவராக பதவி வகித்திருக்கிறார். பிரேசிலின் தொழிலாளர் கட்சியைச் சேர்ந்த இவர், இரண்டாம் முறையாக அதிபர் பதவி வகித்து வருகிறார்.

அடிபெடே ஜஜாகா, (Atifete Jahjaga) அதிபர், கொசோவோ
ஐரோப்பிய நாடுகளில் ஒன்றான கொசோவோ நாட்டின் நான்காவது அதிபரும், அந்நாட்டின் முதல் பெண் அதிபருமான அடிபெடே ஜஜாகா,  முன்னதாக அந்நாட்டு காவல் துறையில் உதவி இயக்குநராக இருந்திருக்கிறார். அமெரிக்காவின் எப்பிஐ அகாதெமியில் படித்து பயிற்சி பெற்றவர் இவர்.

பார்க் ஷியுன் ஹை, (Park Geun-hye) அதிபர், தென் கொரியா
கிழக்கு ஆசிய நாடான தென்கொரியாவின் பெண் அதிபராக பதவி வகித்து வரும் பார்க் ஷியுன் ஹை, கிராண்ட் தேசிய கட்சி சார்பில் போட்டியிட்டு வெற்றி பெற்றவர். இந்த நாட்டில் பிறந்து, இந்த நாட்டின் அதிபரான முதல் நபரும் இவரே. எலெக்ட்ரிக்கல் என்ஜினீயரிங் படித்தவர் இவர். கிழக்காசிய நாடுகளில் வலிமைமிக்க பெண்களில் இவரும் ஒருவராக கருதப்படுகிறார்.

மிச்செல் பேச்லெட், (Michelle Bachelet) அதிபர், சிலி
இலத்தீன் அமெரிக்க நாடான சிலி நாட்டின் சோஷலிஸ்ட் கட்சியின் சார்பில் அந்நாட்டின் முதல் பெண் அதிபராக 2006-லிருந்து 2010 வரை பதவியிலிருந்தவர். பின்னர், .நா. பெண்கள் அமைப்பின் தலைவராக இருந்த அவர், 2013-ஆம் ஆண்டு மார்ச் மாதம் அந்தப் பதவியை ராஜிநாமா செய்து விட்டு மீண்டும், அரசியலுக்கு வந்தார். 2014 முதல் மீண்டும் இந்நாட்டின் அதிபராக இருந்து வருகிறார்.

கொலிண்டா கிராபர் கிட்ரோவிக் (Kolinda Grabar-Kitarović), அதிபர், குரோஷியா

ஐரோப்பிய யூனியனில் உள்ள நாடுகளில் ஒன்று குரோஷியா. இந்நாட்டின் முதல் பெண் அதிபராக சென்ற ஆண்டு பிப்ரவரியில் பதவி ஏற்றுக் கொண்டவர். குரோஷியக் குடியரசின் நான்காவது அதிபர், மிக இளம் வயதிலேயே அதிபர் ஆனவர் என்ற பெருமை இவருக்கு உண்டு. கன்சர்வேட்டிவ் குரோஷியன் டெமாக்ரட்டிக் யூனியன் கட்சியைச் சேர்ந்தவர் இவர்.

அமீனா குயூரிப், (Ameenah Gurib) அதிபர், மொரீஷியஸ்
இந்திய பெருங்கடலில் உள்ள குட்டி தீவு மொரீஷியஸ். பணக்கார நாடான இங்கு 13 லட்சம் மக்கள் வசிக்கின்றனர். இந்த நாட்டின் முதல் பெண் அதிபராக அமீனா குரிப் பாகிம் சென்ற ஆண்டு பதவி ஏற்றார். சுற்றுச்சூழலியல் விஞ்ஞானியான இவர், மொரிஷியஸ் பல்கலைக்கழகத்தில் பேராசிரியராக பணியாற்றி இருக்கிறார்.

பிந்த்யா தேவி பண்டாரி, (Bidhya Devi Bhandari) அதிபர், நேபாளம்
உலகின் மிக உயரமான சிகரத்தை தன்னகத்தே கொண்டிருக்கும் நேபாளம். இந்நாட்டின் நேபாள கம்யூனிஸ்ட் கட்சி (யுஎம்எல்) சார்பில் வித்யா தேவி பண்டாரி, கடந்த ஆண்டு அக்டோபரில் அதிபராக பதவி ஏற்றுக் கொண்டார். இதன் மூலம் நேபாளத்தின் முதல் பெண் அதிபர் என்ற பெருமையும் அவருக்குக் கிடைத்தது.
அதிபர் வித்யா தேவி பண்டாரி நேபாளத்தின் மன்னர் ஞானேந்திராவின் சர்வாதிகாரத்தை எதிர்த்து மக்களைத் திரட்டி தொடர்ந்து போராட்டங்கள் நடத்திவந்தார். அவரது பெருமுயற்சியால் மன்னரின் சர்வாதிகார ஆட்சி 2008ல் முடிவுக்கு வந்தது. அதைத்தொடர்ந்து நேபாளத்தில் ஜனநாயகம் மலர்ந்தது. நூற்றாண்டுகளாகத் தொடர்ந்துவந்த மன்னராட்சி ஒழிக்கப்பட்டு, குடியரசானபிறகு வித்யா தேவி நேபாளத்தின் இரண்டாவது அதிபராக ஆகியுள்ளார்.

ஹில்டா ஹெயினே, (Hilda Heine) அதிபர், மார்ஷல் தீவுகள்
 பசிபிக் பெருங்கடலில் அமைந்துள்ள மைக்ரோனேசியா தீவுக் கூட்டத்தின் ஒரு பகுதி மார்ஷல் தீவுகள். 72,000 பேர் வசிக்கும் இத்தீவின் தலைநகரம் மஜுரோ. 29 பவளத் தீவுகளை உள்ளடக்கியது இந்த மார்ஷல் தீவுகள். இந்த நாட்டின் முதல் பெண் அதிபராக, இரு வாரங்களுக்கு முன்பு பொறுப்பேற்றிருக்கிறார் ஹில்டா ஹெயினே. அமெரிக்காவில் உள்ள சதர்ன் கலிபோர்னியா பல்கலைக்கழகத்தில் முனைவர் பட்டம் பெற்றவர் இவர். ஆரம்ப காலங்களில் இவர் பள்ளி ஆசிரியராக பணியாற்றியவர்.


ஷேக் ஹசீனா, பிரதமர், வங்கதேசம்
நமக்கு அண்டை நாடாக இருக்கும் வங்கதேசத்தின் தற்போதைய பிரதமராக இருப்பவர் ஷேக் ஹசீனா. இந்நாட்டின் முதல் அதிபரான ஷேக் முஜிபுர் ரகுமானின் முதல் மகள் இவர். 1981-லிருந்து வங்கதேசத்தின் முக்கிய அரசியல் கட்சியான அவாமி லீக்கின் தலைவராக இருந்துவரும் ஷேக் ஹசீனா, அந்நாட்டின் இரண்டாவது பெண் பிரதமராக, 1996-ல் பதவியேற்றார். மீண்டும் 2009-ல் இரண்டாவது முறையாக பிரதமர் பதவியேற்றவர், இன்று வரை பொறுப்பில் இருக்கிறார். இந்நாட்டின் முதல் பெண் பிரதமராக இருந்தவர் காலிதா ஜியா.

போர்டியோ சிம்ப்ஸன் மில்லர் (Portia Simpson-Miller), பிரதமர், ஜமைக்கா

கரீபியின் தீவு நாடுகளில் ஒன்றான ஜமைக்காவின் முதல் பெண் பிரதமராக இருப்பவர் போர்டியோ சிம்ப்ஸன் மில்லெர். ஜமைக்காவின் மக்கள் தேசியக் கட்சியைச் சேர்ந்த இவர், முதன்முதலாக 2006-ல் பிரதமராக பதவியேற்றார். ஓராண்டுக்குள் தேர்தல் வந்துவிடவே இவரது பதவிக்காலம் முடிந்து போனது. மீண்டும் 2012-ல் இரண்டாவது முறையாக பிரதமர் பதவியேற்றவர், தற்போது வரை பொறுப்பில் இருக்கிறார்.

பீட்டா ஸசிட்லோ, (Beata Szydło) பிரதமர், போலந்து

மத்திய ஐரோப்பிய நாடான போலந்தில் சட்டம் மற்றும் நீதிக்கட்சியின் சார்பில் பிரதமராக பதவி வகித்து வருகிறார் பீட்டா ஸசிட்லோ. இந்நாட்டின் மூன்றாவது பெண் பிரதமர் இவர். இவருக்கு முன்னதாக, ஹான்னா சுச்சோக்கா, ஈவா கொப்பாக்ஸ் ஆகியோர் பெண் பிரதமர்களாக இருந்துள்ளனர். பீட்டா ஸசிட்லோவுக்கு முன்பு அந்நாட்டின் பிரதமராக இருந்தவர் ஈவா கொப்பாக்ஸ்.

சாரா கூகொங்கெல்வா, (Saara Kuugongelwa) பிரதமர், நமீபியா 

தென்மேற்கு ஆப்ரிக்க கண்டத்தில் உள்ள நாடு நமீபியா. தென்னாப்ரிக்க நாட்டிடமிருந்து அதிகார பூர்வமாக 21 மார்ச் 1990-ல் இந்த நாடு குடியரசானது. அந்நாட்டில், முதல் பெண் பிரதமராக, தற்போது பதவி வகித்து வருகிறார் சாரா கூகொங்கெல்வா. இந்நாட்டின் நான்காவது பிரதமர் இவர். பொருளாதாரத்தில் பட்டம் பெற்ற இவர், அந்நாட்டின் திட்ட கமிஷன் துறையின் டைரக்டர் ஜெனரலாக பதவி வகித்திருக்கிறார். 2003-ல் நிதியமைச்சராகவும் பதவி வகித்திருக்கிறார். இவர் ஸ்வபோ பார்ட்டி என்று அழைக்கப்படும் தென்மேற்கு ஆப்ரிக்க மக்களின் கூட்டமைப்புக் கட்சியின் சார்பில் பிரதமராக தெரிவு செய்யப்பட்டிருக்கிறார்.

எர்னா சோல்பெர்க், (Erno Solberg), பிரதமர், நார்வே

ஐரோப்பிய நாடுகளில் ஒன்றான நார்வேயின் பிரதமராக இருக்கிறார் எர்னா சோல்பெர்க். இந்நாட்டின் 28-வது பிரதமர் மற்றும் இந்நாட்டின் இரண்டாவது பெண் பிரதமர் இவர். கன்சர்வேட்டிவ் கட்சியின் தலைவராகவும் இருந்து வரும் இவர், புள்ளியியல், பொருளாதாரம், சமூகவியல், அரசியல் அறிவியல் ஆகியவற்றில் பட்டம் பெற்றிருக்கிறார். உள்ளாட்சி அதிகாரம் மற்றும் மண்டல வளர்ச்சித் துறை அமைச்சராக பதவி வகித்திருக்கிறார் எர்னா. 

(படம் உதவி: புதிய தலைமுறை கல்வி வார இதழ்)




Wednesday, December 30, 2015

நிகழ்வுகள் 2015




ஜனவரி

@ 1950-ல் உருவாக்கப்பட்ட திட்டக்கமிஷன், ‘நிதி ஆயோக்’ (NITI- National Institution for Transforming India) என்ற பெயரில் செயல்படத் தொடங்கியது. நிதி ஆயோக் அமைப்பின் முதல் தலைவர்: பிரதமர் நரேந்திர மோடி. முதல் துணைத்தலைவர்: அரவிந்த் பனகாரியா.
@ ஆந்திரபிரதேச மாநிலத்தின் சுகாதாரத்துறையின் விளம்பரத் தூதுவராக அமிதாப் பச்சன் நியமனம்.
@ பிரசவ கால விடுப்பு, 135 நாட்கள் இருந்ததை 180 நாட்களாக மாற்றி பீகார் அரசு உத்தரவு
@ தென்னாப்பிரிக்காவிலிருந்து காந்திஜி இந்தியா திரும்பி, 100 ஆண்டுகள் நிறைவடைந்ததால் சிறப்பு தபால் தலை வெளியிடப்பட்டது.
@ நிதி ஆயோக் அமைப்பின் தலைமைச் செயல் அதிகாரியாக சிந்துஸ்ரீ குல்லார் நியமனம்.
@ கேரளாவில் உள்ள இடுக்கி மாவட்டம்,  நாட்டிலேயே முதன்முதலாக முழுமையாக இணையதள இணைப்புடன் இணைக்கப்பட்ட மாவட்டமானது.
@ பிரபல கார்ட்டூனிஸ்ட் ஆர். கே. லட்சுமண் காலமானார்.
@ இலங்கை அதிபர் தேர்தலில் மைத்ரிபால சிறிசேன வெற்றி.
@ இலங்கை உச்சநீதிமன்றத்தின் புதிய தலைமை நீதிபதியாக கே.ஸ்ரீபவன் நியமனம். சுப்பையா சர்வானந்திற்குபிறகு இப்பதவியை வகிக்கும் இரண்டாவது தமிழர் இவர்.
@ மகாராஷ்டிராவிலுள்ள நாசிக் சிறையில் சிறைக்கைதிகளுக்காக சிறைக் கைதிகளே நடத்தும் வானொலி ஒலிபரப்பு துவங்கப்பட்டது. இந்நிகழ்ச்சி ‘சுதர்வாணி’ என்ற பெயரில் ஒலிபரப்பாகிறது.
@ புதிய வெளியுறவுச் செயலராக ஐஎப்எஸ் அதிகாரி ஜெய்சங்கர் நியமனம்.
@ உடல் உறுப்பு தானத்தில் தேசிய அளவில் தமிழகம் முதலிடம்
@ பெண்குழந்தைகளைக் காப்பாற்றவும், அவர்களுக்கு அதிகாரம் வழங்கவும் ‘மகளைக் காப்போம், மகளுக்கு கற்பிப்போம்’ என்ற திட்டத்தின் பிரசார தூதராக நடிகை மாதுரி தீட்சித் நியமனம்.
@ ஜனவரி 25-ல் தேசிய வாக்களர் தினம் கொண்டாடப்பட்டது. இந்த ஆண்டுக்கான வாசகம் ‘சுலபமான பதிவு, சுலபமான திருத்தம்’.
@ தமிழ்நாட்டில் உள்ள தேனி மாவட்டத்தில் நியூட்ரினோ ஆய்வகம் அமைக்க மத்திய அரசு அனுமதி. ரூ.1500 கோடி நிதி ஒதுக்கீடு
@ டெஸ்ட் கிரிக்கெட் போட்டியில் இலங்கை வீரர் குமார் சங்ககரா 12 ஆயிரம் ரன்களைக் கடந்தார்.
@ இந்திய நீச்சல் வீராங்கனை பக்டி சர்மா அண்டார்ட்டிக் பெருங்கடலில் 1 டிகிரி குளிர் நிலையில் 1.4 மைல் தூரத்தை, 52 நிமிடங்களில் கடந்து உலக சாதனை படைத்தார்.
@ அமெரிக்காவின் மியாமி தீவில் நடைபெற்ற பிரபஞ்ச அழகிப் போட்டியில் கொலம்பியாவைச் சேர்ந்த பவுலினா வேகா முதலிடம்.
@ இந்தியாவின் 66-வது குடியரசு தின விழாவில், அமெரிக்க அதிபர் பராக் ஒபாமா பல்கேற்றார். இந்தியக் குடியரசு தின விழாவில் அமெரிக்க அதிபர் கலந்து கொள்வது இதுவே முதல்முறை.
@ தமிழ்நாட்டில், மாநில மனித உரிமை ஆணைய தலைவராக ஓய்வு பெற்ற நீதிபதி டி. மீனா குமாரி நியமனம்.
@ இந்திய தேர்தல் ஆணையத்தின் தலைமைத் தேர்தல் ஆணையராக எச்.எஸ்.பிரம்மா பொறுப்பேற்பு
@ இஸ்ரோவின் புதிய தலைவராக ஏ.எஸ். கிரண் குமார் நியமனம்
@ 2014-ஆம் ஆண்டின் சிறந்த கால்பந்து வீரருக்கான பிபா விருதை மூன்றாவது முறையாக கிறிஸ்டியானோ ரொனால்டோ வென்றார்.
@ வங்கதேச நாட்டின் உச்சநீதிமன்ற தலைமை நீதிபதியாக சுரேந்திர குமார் சின்கா நியமனம். இந்நாட்டில் இந்து மதத்தை சேர்ந்த ஒருவர் இப்பொறுப்பை ஏற்பது இதுவே முதல் முறை.
@ குரோஷியா நாட்டின் முதல் பெண் அதிபராக கொலிந்தா கிராபா கிராதொவிச் தேர்வு
@ இந்தியாவிலேயே தயாரிக்கப்பட்ட முதல் அணுசக்தி நீர்மூழ்கி கப்பல் ஐ.என்.எஸ். ஹரிஹந்த் பரிசோதனை முறையில் இயக்கப்பட்டது.
@ நாட்டில் முதல்முறையாக கேரளாவிலுள்ள அனைத்து அரசுப்பள்ளிகளிலும் டிஜிட்டல் புத்தகங்கள் – கேரள அரசு அறிவிப்பு
@ மதன்மோகன் மாளவியா மற்றும் வாஜ்பாய் ஆகிய இருவருக்கும் பாரத ரத்னா பட்டம் அறிவிப்பு
@ சீனாவின் அமைதிக்கான கன்பூசியஸ் பரிசு கியூபாவின் முன்னாள் அதிபர் பிடல் காஸ்ட்ரோவுக்கு வழங்கப்பட்டது.
@ நாட்டிலேயே முதல்முறையாக கடலுக்கு அடியில் காட்சியகம் அமைக்க மாமல்லபுரம் தேர்வு.
@ உலகக்கோப்பை கிரிக்கெட் போட்டி – 2015: தூதராக முன்னாள் இந்திய கிரிக்கெட் வீரர் சச்சின் தெண்டுல்கர் நியமனம்.
@ இந்திய உளவுத்துறை தலைவராக தினேஷ் சர்மா நியமனம்.

பிப்ரவரி

@ ஆஸ்கர் விருது பெற்ற சிறந்த திரைப்படம் – பேர்ட்மேன் (அமெரிக்கா)
@ பொருளாதார அறிஞரும், நோபல் பரிசு பெற்றவருமான அமர்த்தியா சென், பிரிட்டனின் ‘ஜான் மேனார்டு கேன்ஸ்’ விருது பெற தேர்வு செய்யப்பட்டார்.
@ மராத்திய நாவலாசிரியரான பாலச்சந்திர நெமதேவுக்கு 2014-ஆம் ஆண்டுக்கான ஞானபீட விருது அறிவிப்பு.
@ 67-வது மத்திய பட்ஜெட்டை மத்திய நிதியமைச்சர் அருண் ஜெட்லி தாக்கல் செய்தார்.
@ உள்நாட்டில் தயாரிக்கப்பட்ட பிரித்வி – 2 ஏவுகணை சோதனை வெற்றி
@ உலகக்கோப்பை கிரிக்கெட் போட்டியில் முதன் முதலாக இரட்டை சதம் அடித்த வீரர் கிறிஸ் கெயில். ஜிம்பாப்வே அணிக்கு எதிராக இச்சாதனையை இவர் நிகழ்த்தினார்.
@ 33 வயதில் கிராண்ட்ஸ்லாம் பட்டம் வென்ற உலகின் முதல் வீராங்கனை என்ற பெருமையை செரீனா வில்லியம்ஸ் பெற்றார்.
@ இந்திய விடுதலைப் போராட்ட வீரரும், பத்திரிகையாளருமான ஐ. மாயாண்டி பாரதி காலமானர்.

மார்ச்
@ தமிழகத்தைச் சேர்ந்த நந்திதா கிருஷ்ணா, சாய்லஷ்மி பலிஜெபள்ளி, பி. கௌசல்யா ஆகியோர் மகளிர் தினத்தன்று சக்தி புரஸ்கர் விருது பெற்றனர்.
@ 2015-க்கான ஸ்டாக்ஹோம் நீர் விருது பெற, இந்திய தண்ணீர் மனிதர் ராஜேந்திர சிங் தேர்வு.
@ செம்மொழி தமிழாய்வு நிறுவனம் வழங்கும் தொல்காப்பியர் விருதுக்கு தினமலர் ஆசிரியர் கிருஷ்ணமூர்த்தி தேர்வு.
@ மொழிபெயர்ப்புக்கான சாகித்ய அகாதெமி விருது பெற எழுத்தாளர் சா. தேவதாஸ் தேர்வு. ஆங்கிலத்தில் பபானி பட்டாச்சார்யா எழுதிய ‘ஷேடோ @ ஓவர் லடாக்’ என்ற நூலை ‘லடாக்கிலிருந்து கவிழும் நிழல்’ என்ற தலைப்பில், தமிழில் மொழிபெயர்த்திருக்கிறார்.
@ 2014-ஆம் ஆண்டுக்கான சர்வதேச காந்தி விருது பெற, இந்திய விண்வெளி ஆய்வு நிறுவனமான இஸ்ரோ தேர்வு.
@ பழம்பெரும் இந்தி நடிகர் சசி கபூர், தாதா சாகேப் பால்கே விருது பெற தேர்வு
@ தேசிய திரைப்பட விருது விழாவில், சிறந்த தமிழ்ப்படத்திற்கான விருது குற்றம் கடிதல் திரைப்படத்திற்கு கிடைத்துள்ளது. தேசிய அளவிலான சிறந்த குழந்தைகள் படத்திற்கான விருது காக்கா முட்டை படத்திற்கும், சிறந்த துணை நடிகருக்கான விருது பாபி சிம்ஹாவிற்கும் வழங்கப்பட்டது.
@ விஸ்வபாரதி பல்கலைக்கழகத்தின் வேந்தராக பிரதமர் நரேந்திர மோடி நியமனம்
@ தமிழக தேர்தல் ஆணையராக பெ.சீத்தாரமன் நியமனம்.
@ 1999-ம் ஆண்டு துண்டிக்கப்பட்ட அமெரிக்கா- கியூபா இடையிலான நேரடி தொலைபேசி சேவை மீண்டும் தொடங்கப்பட்டது
@ பிரிட்டனில் உள்ள ராயல் சொசைட்டி தலைவராக நோபல் பரிசு பெற்ற தமிழ் விஞ்ஞானி வெங்கட்ராமன் ராமகிருஷ்ணன் தேர்வு.
@ அமெரிக்காவிற்கான புதிய இந்திய தூதராக அருண் குமார் சிங் நியமனம்.
@ இந்தியப் பிரதமர் நரேந்திர மோடி மூன்று நாள் பயணமாக இலங்கை சென்றார். 28 ஆண்டுகளுக்குப் பின்னர் இலங்கை சென்ற முதலாவது இந்தியப் பிரதமர் இவர்.
@ இந்திய கிரிக்கெட் கட்டுப்பாட்டு வாரிய தலைவராக ஜக்மோகன் டால்மியா தேர்வு
@ தில்லியைச் சேர்ந்த அதிதி ஆர்யா, 2015-ஆம் ஆண்டுக்கான இந்திய அழகியாகத் தேர்வு
@ போர்ப்ஸ் பத்திரிகை வெளியிட்ட உலக அளவில் பணக்காரர்களின் வரிசையில் பில்கேட்ஸ் முதல் இடம் பெற்றுள்ளார். இந்திய அளவில் முதல் இடம் முகேஷ் அம்பானி.
@ ஆந்திராவின் புதிய தலைநகராமாக அமராவதி தேர்வு.
@ 21 ஆண்டுகளுக்குப் பிறகு மீண்டும் ஒரு ரூபாய் நோட்டு வெளியிடப்பட்டது.
@ சிங்கப்பூரின் தந்தை என அழைக்கப்படும் லீ குவான் யூ காலமானார்.
@ உலகக்கோப்பை கிரிக்கெட் 2015-ல் ஆஸ்திரேலிய அணி சாம்பியன் கோப்பையை கைப்பற்றியது. நியுசிலாந்து அணியை வீழ்த்தி 5-ஆவது முறையாக இக்கோப்பையை கைப்பற்றியது ஆஸ்திரேலியா.
@ வில்வித்தையில் 3 வயது சிறுமி ஷிவானி தேசிய சாதனை.

ஏப்ரல்
@ ஆந்திரப் பிரதேசத்தில் திருப்பதியை அடுத்துள்ள வனப்பகுதிய்ல் செம்மரம் கடத்தியவர்கள் என்ற குற்றச்சாட்டில் தமிழ்நாட்டைச் சேர்ந்த 20 கூலித் தொழிலாளர்கள் காவல்துறையினரால் ஏப்ரல் 7-ஆம் தேதி அன்று சுட்டுக் கொல்லப்பட்டனர்.
@ இந்தியாவின் தலைமை தேர்தல் ஆணையராக நசீம் ஜெய்தி நியமனம். இவருக்கு முன்னதாக தேர்தல் ஆணையராக இருந்த ஹரிசங்கர் பிரம்மா ஓய்வு பெற்றதை அடுத்து, நசீம் சைய்தி தேர்வு.
@ நியூயார்க் நீதிமன்ற நீதிபதியாக தமிழகத்தைச் சேர்ந்த ராஜராஜேஸ்வரி தேர்வு. இப்பதவியை வகிக்கும் முதல் இந்தியர் இவர். 
@ நாட்டில் திறந்த வெளி கழிப்பிடம் இல்லாத முதல் மாவட்டமாக மேற்கு வங்க மாநிலத்தில் உள்ள நாடியா அறிவிப்பு
@ நாடு முழுவதும் 100 ஸ்மார்ட் சிட்டிகளை உருவாக்க மத்திய அரசு ஒப்புதல்.
@ அமெரிக்க அதிபர் பராக் ஒபாமாவும் கியூபா தலைவர் ராவுல் காஸ்ட்ரோவும் பனாமாவில் நடந்த அமெரிக்காக்களின் உச்சிமாநாட்டில் சந்தித்துக் கொண்டனர். கியூபா புரட்சிக்குப் பின்னர் இரு நாட்டுத்தலைவர்களும் சந்தித்துக் கொள்வது இதுவே முதல் முறை.
@ உள்நாட்டுக் கலவரத்தால் ஏமனில் சிக்கியிருந்த 4640 இந்தியர்களையும் 960 வெளிநாட்டவர்களையும் இந்தியா அங்கிருந்து வெளியேற்றியது.
@ நேபாளத் தலைநகர் காத்மண்டுவில் ஏற்பட்ட நிலநடுக்கத்தில் 1,500 பேர் உயிரிழந்தனர், பல்லாயிரக்கணக்கானோரைக் காணவில்லை.
@ பிரபல எழுத்தாளர் ஜெயகாந்தன் காலமானார்
@ அமைதிக்கான நோபல் பரிசு பெற்ற மலாலா மற்றும் இரண்டு பள்ளி சிறுமிகள் மீது தாக்குதல் நடத்திய 10 பேருக்கு பாகிஸ்தான் நீதிமன்றம் ஆயுள் தண்டனை வழங்கியது.
@ இஸ்லாமியப் பக்திப் பாடகரான நாகூர் ஹனீபா காலமானார்.
@ ஆசியாவிலேயே முதல்முறையாக மோட்டார் சைக்கிள் ஆம்புலன்ஸ் திட்டம் கர்நாடகாவில் அறிமுகம்.
@ குஜராத்தில் உள்ள சபர்மதி ஆற்றங்கரையில் முதல் ஸ்மார்ட் சிட்டி  அமைக்கப்பட உள்ளது.
@ உள்நாட்டிலேயே தயாரிக்கப்பட்ட அக்னி – 3 ஏவுகணை சோதனை வெற்றி
@ விண்வெளியில் உள்ள சிறிய கிரகம் ஒன்றிற்கு, இந்திய செஸ் விளையாட்டு வீரரான விஸ்வநாதன் ஆனந்தின் பெயர் சூட்டப்பட்டிருக்கிறது. அந்த கிரகத்திற்கு ‘விஷ்யானந்த்’ என பெயரிடப்பட்டிருக்கிறது.
@ பெண்கள் டென்னிஸ் இரட்டையர் பிரிவில் இந்திய வீராங்கனை சானியா மிர்சா முதலிடம் பிடித்து சாதனை
@ உலகில் அதிக ஊதியம் பெறும் தலைமைச் செயல் அதிகாரிகளின் வரிசையில் முதலிடம் பிடித்தவர், மைக்ரோசாப்ட் நிறுவன சிஇஓ பொறுப்பில் இருக்கும் சத்ய நாதெல்லா. இவரது ஆண்டு வருமானம் 522 கோடி ரூபாய்.
@ பிரபல ஓவியரான கோபுலு காலமானார்.

மே
@ உலகில் முதல்முறையாக மேற்கு வங்க மாநிலம் கொல்கத்தாவில் உள்ள கல்லூரி ஒன்றிற்கு திருநங்கை ஒருவர் கல்லூரி முதல்வராக நியமனம்.
@ பிரிட்டிஷ் பொதுத் தேர்தலில்,  டேவிட் கேமரூன் தலைமையிலான கன்சர்வேட்டிவ் கட்சி கூட்டணி பெரும்பான்மை இடங்களில் வெற்றி பெற்றது.
@ சொத்துக்குவிப்பு வழக்கில் தமிழக முன்னாள் முதல்வர் ஜெ. ஜெயலலிதா, சசிகலா உட்பட நால்வரை விடுதலை செய்து கர்நாடக உயர்நீதிமன்றம் தீர்ப்பளித்தது.
@ சொத்துக்குவிப்பு வழக்கில் இருந்து விடுவிக்கப்பட்ட ஜெ. ஜெயலலிதா, தமிழக முதலமைச்சராக  மீண்டும் பொறுப்பேற்றார்.
@ ஈழத்தமிழ் எழுத்தாளர் ஷோபா சக்தி நடித்த தீபன் என்ற பிரெஞ்சுத் திரைப்படம்  கேன்ஸ் திரைப்பட விழாவில் திரைப்படத்துக்கான தங்கப் பனை விருதை வென்றது.
@ ஐபிஎல் கோப்பையை மும்பை இந்தியன்ஸ் அணி வென்றது. இரண்டாம் இடத்தை சென்னை சூப்பர் கிங்ஸ் அணி பெற்றது.
@ விவசாயிகளுக்கு ‘கிஷான் சேனல்’ என்ற தனி தொலைக்காட்சியை பிரதமர் மோடி தொடங்கி வைத்தார்.

ஜூன்

@ நெஸ்ட்லே நிறுவன தயாரிப்பான மேகி நூடுல்ஸில் அளவுக்கு அதிகமாக மோனோசோடியம் க்ளூட்டமேட் மற்றும் ஈயம் இருப்பதை அடுத்து, இந்த நூடுல்ஸ் விற்பனைக்கு உத்தர பிரதேச அரசு தடை விதித்தது. இதனையடுத்து இந்தியாவில் உள்ள பல மாநிலங்களும் மேகி நூடுல்ஸ் விற்பனைக்கு தடை விதித்தன.
@  பார்வையற்ற பெண் பெனோ செபைன், இந்தியாவின் முதல் ஐஎப்எஸ் அதிகாரியாக நியமனம்.
@ மொரீஸியஸ் நாட்டின் முதல் பெண் ஜனாதிபதியானார் அமீனா குரிப் பாகிம்
@  இலங்கை கிரிக்கெட் அணியின் முன்னாள் வீரரான சனத் ஜெயசூரியா, அந்நாட்டின் துணை அமைச்சராக பதவியேற்பு
@  21-ஆம் நூற்றாண்டின் சிறந்த பேட்ஸ்மேனாக சச்சின் தெண்டுல்கர் தேர்வு
@ இந்தியாவின் இரண்டாவது முஸ்லிம் பெண் ஐபிஎஸ் அதிகாரியானார் லக்னோவைச் சேர்ந்த அன்ஜும் அரா.
@  உலகின் முதல் எலெக்ட்ரானிக் விமானத்தை உருவாக்கி சாதனை படைத்தது சீனா.
@  சென்னை மெட்ரோ ரெயில் திட்டத்தை ஜுன் 29-ஆம் தேதி தமிழக முதல்வர் ஜெயலலிதா தொடங்கி வைத்தார்.

ஜூலை

@  தமிழ்நாட்டில் கட்டாய ஹெல்மெட் சட்டம் ஜூலை 1-ஆம் தேதி அமலுக்கு வந்தது.
@ பிரபல தமிழ்த் திரைப்பட இசையமைப்பாளர் எம்.எஸ்.விஸ்வநாதன் ஜூலை 17 அன்று காலமானார்.
@ முழுவதும் உள்நாட்டிலேயே தயாரிக்கப்பட்ட ஆகாஷ் ஏவுகணை இந்திய விமானப்படையில் சேர்க்கப்பட்டது.

@  பாதுகாப்பான மற்றும் தூய்மையான உணவை உறுதி செய்வதற்கான  திட்டமான ‘சுரக்சி காத்யா அபியான்’ அறிமுகம்.
@  நாட்டில் விளையாட்டுகளை மேம்படுத்தும் நோக்கில் ‘All India Council of Sports’ என்ற புதிய அமைப்பு உருவாக்கம்.
@  இண்டர்நேஷனல் மானிட்டரி பண்ட் அமைப்பிடமிருந்து பெற்ற கடனை திருப்பி செலுத்த இயலாத முதல் ஐரோப்பிய நாடு கிரீஸ்.
@  பிரேசில், ரஷ்யா. இந்தியா, சீனா, தென்னாபிரிக்க நாடுகளின் கூட்டமைப்பான பிரிக்ஸ், தனக்கென புதிய வங்கியை சீனாவின் ஷாங்காயில் தலைமை இடமாகக் கொண்டு செயல்படத்துவங்கியது. இந்த வங்கியின் முதல் தலைவராக இந்தியாவின் கே.வி. காமத் நியமனம்.
@  டிராய் அமைப்பின் தலைவராக ராம் சேவக் சர்மா நியமனம்.
@  ராமன் மகசேசே விருது இந்தியர்களான சஞ்சீவ் சதுர்வேதி, அன்ஷு குப்தா உள்பட ஐந்து பேருக்கு அறிவிப்பு
@  முன்னாள் குடியரசுத் தலைவர் அப்துல் கலாம் ஜூலை 27- அன்று காலமானார்.
@  விம்பிள்டனில் பட்டம் வென்ற முதல் இந்திய வீராங்கனை என்ற பெருமையைப் பெற்றார் சானியா மிர்சா
@  ஐபிஎல் முறைகேடுகளை விசாரித்த ஆர்.எம். லோத்தா தலைமையினான விசாரணைக் குழு அறிக்கையின்படி, சென்னை மற்றும் ராஜஸ்தான் அணி விளையாட இரண்டு ஆண்டுகள் தடை விதிப்பு.

ஆகஸ்ட்

@  தமிழக அரசின் முதல் அப்துல்கலாம் விருது, பெண் விஞ்ஞானி வளர்மதிக்கு வழங்கப்பட்டது.
@  நாட்டிலேயே தூய்மையான 10 நகரங்களில் மைசூருக்கு முதலிடமும் திருச்சிக்கு இரண்டாம் இடமும் கிடைத்துள்ளது.
@  2009-ஆம் ஆண்டு தொடங்கப்பட்ட ஆதார் அட்டை வழங்கும் அமைப்பு, நிதி ஆயோக்குடன் இணைப்பு
@  குஜராத் மாநிலத்தில் பிளாஸ்டிக் பயன்படுத்தத் தடை
@  பொதுத்துறை வங்கிகளை சீரமைக்கும் 7 அம்ச திட்டத்திற்கு ‘மிஷன் இந்திர தனுஷ்’ என பெயரிடப்பட்டது.
@ மத்திய பெட்ரோலிய அமைச்சகத்தால் ஆன்லைன் மூலம் புதிய சிலிண்டர் இணைப்பு பெறும் வசதியைத் தரும் சாஹச் திட்டம் தொடக்கம்.
@ சூரிய சக்தி மூலம் இயங்கும் உலகின் முதல் விமான நிலையம் எனும் சிறப்பை கொச்சி விமான நிலையம் பெற்றது.
@ இலங்கைக்கு வராகா எனும் ரோந்துக் கப்பலை வழங்கியது இந்தியா.
@ இலங்கையின் பிரதமராக ரணில் விக்ரமசிங்கே நான்காவது முறையாக நியமனம்.
@ பிரபல கன்னட எழுத்தாளர் மல்லேசப்பா மடிவாளப்பா காலமானார்.
@ கிரேக்க நாட்டின் முதல் பெண் பிரதமராக வாஸ்ஸில்கி தாணு பதவியேற்பு
@ சவுதி அரேபியாவில் முதல்முறையாக நகராட்சித் தேர்தலில் போட்டியிடவும், வாக்களிக்கவும் பெண்களுக்கு அனுமதி.
@ தமிழக கிரிக்கெட் வீரர் ரவிச்சந்திரன் அஸ்வினுக்கு அர்ஜுனா விருதும். சானியா மிர்சாவிற்கு ராஜுவ் காந்தி கேல் ரத்னா விருதும் வழங்கப்பட்டது.
@ 2014-ஆம் ஆண்டிற்கான சரஸ்வதி சம்மான் விருது பெற, வீரப்ப மொய்லி தேர்வு.
@ கூகுள் நிறுவனத்தின் தலைமைச் செயல் அதிகாரியாக தமிழகத்தைச் சேர்ந்த சுந்தர் பிச்சை நியமனம்.
@ ஒலிம்பிக் அமைப்பில் 206-வது நாடாக தெற்கு சூடான் இணைந்தது.
@ இங்கிலாந்து 3-1 என்ற கணக்கில் ஆஸ்திரேலிய அணியை வென்று ஆஷஸ் தொடரை வென்றது.
@ இலங்கை நாடாளுமன்றத் தேர்தல், 2015: ஆளும் ஐக்கிய தேசியக் கட்சி 106 இடங்களையும், ஐக்கிய மக்கள் சுதந்திரக் கூட்டணி 95 இடங்களையும், தமிழ்த் தேசியக் கூட்டமைப்பு 16 இடங்களையும் வென்றன.

செப்டம்பர்

@ சிரியா உள்நாட்டுப்போர்: 120,000 அகதிகளை ஐரோப்பிய ஒன்றிய நாடுகளில் குடியமர்த்த ஐரோப்பிய நாடாளுமன்றம் ஒப்புதல் அளித்தது.
@ நேபாளத்தில் புதிய அரசியலமைப்புச் சட்டம் கொண்டுவரப்பட்டு, அந்நாடு மதச்சார்பற்ற நாடாக அறிவிக்கப்பட்டது.
@ சவூதி அரேபியாவின் மெக்கா நகருக்கு அருகே மினா எனுமிடத்தில் ஏற்பட்ட கூட்ட நெரிசலில் சிக்கி 717 பேர் உயிரிழப்பு; 863 பேர் காயம்.
@ ஆஸ்திரேலியாவின் புதிய பிரதமராக மால்கம் டர்ன்புல் பதவியேற்பு.
@ பிரபல எழுத்தாளரான கௌதம நீலாம்பரன் காலமானார்.
@ சர்வதேச கிரிக்கெட் சங்க முன்னாள்  தலைவரான ஜக்மோகன் டால்மியா  காலமானார்.
@  அத்வைத வேதாந்த ஆசிரியரான தயானந்த சரசுவதி சுவாமிகள் காலமானார்.

அக்டோபர்

@ ஐக்கிய நாடுகள் பாதுகாப்பு அவைக்கு 2016-17 ஆம் ஆண்டுக்கான நிரந்தரமல்லாத உறுப்பு நாடுகளாக எகிப்து, செனகல், உருகுவே, ஜப்பான், உக்ரைன் ஆகிய நாடுகள் சேர்த்துக்கொள்ளப்பட்டன.
@ ஆந்திரப்பிரதேச புதிய தலைநகராக அமராவதி கட்டுமானப் பணிகளுக்கு பிரதமர் நரேந்திர மோடி, அடிக்கல் நாட்டினார்.
@ பிரபல தென்னிந்திய நடிகையான மனோரமா காலமானார்.
@ எழுத்தாளரும் பிரபல விமர்சகருமான வெங்கட் சாமிநாதன் காலமானார்.

நவம்பர்

@ வளிமண்டலத்தில் பசுமை இல்ல வாயுவானது, 2014- ஆம் ஆண்டில் அதீத அளவை எட்டியுள்ளதாக அறிவிக்கப்பட்டுள்ளது.
@ மியான்மர் பொதுத் தேர்தலில் ஆளும் கட்சி தனது தோல்வியடைந்தது. ஆங் சான் சூகியின் சனநாயகத்துக்கான தேசிய முன்னணி 348 இடங்களைக் கைப்பற்றி, அறுதிபெரும்பான்மை பெற்றது.
@ பிரான்சின் தலைநகர் பாரீசில் நிகழ்த்தப்பட்ட தொடர் குண்டு வெடிப்பு மற்றும் துப்பாக்கி சூட்டினால் குறைந்தது 26 பேர் உயிரிழந்தனர். ஐஎஸ் தீவரவாத அமைப்பு இத்தாக்குதலுக்கு பொறுப்பேற்றுக்கொண்டது.
@ தமிழ் திரைப்பட இயக்குநர் கே. எஸ். கோபாலகிருஷ்ணன் காலமானார்
@ பக்திப் பாடகரான பித்துக்குளி முருகதாஸ் காலமானார்.

டிசம்பர்

@ டிசம்பர் 1-ஆம் தேதி சென்னையில் 49 சென்டி மீட்டர் மழை கொட்டித் தீர்த்தது. சென்னை மற்றும் அதன் புறநகர்ப்பகுதிகள் வெள்ளத்தால் மூழ்கின. பல்லாயிரக்கணக்கானோர் வீடுகளை இழந்தனர். பலர் உயிரிழப்பு.
@ இந்தியாவின் முன்னாள் பிரதமர் ராஜீவ் காந்தி கொலை வழக்கில் குற்றவாளிகள் எனக் கண்டறியப்பட்டவர்களை விடுவிக்க தமிழக அரசுக்கு உரிமை இல்லை என இந்திய உச்சநீதிமன்றம் தீர்ப்பு.
@ ரஷ்யா, அமெரிக்க, மற்றும் பிரிட்டன் விண்வெளி வீரர்கள் மூவரை ஏற்றிக் கொண்டு சோயுஸ் டிஎம்ஏ-19எம் பைக்கானூரில் இருந்து சர்வதேச விண்வெளி நிலையம் நோக்கி வெற்றிகரமாக ஏவப்பட்டது.
@ பிரான்ஸ் நாட்டின் பாரிஸ் நகரில் நடைபெற்ற பருவநிலை மாற்றம் குறித்த சர்வதேச மாநாட்டில், அதிகரித்து வரும் வெப்பநிலையை 2 டிகிரி செல்சியஸிற்கு கீழ் குறைக்க வேண்டும் என்று முடிவு செய்யப்பட்டது.
@ கென்யாவில் உலக வர்த்தக மைய மாநாடு நடைபெற்றது.
@ தமிழக அரசின் சட்டத்துக்கு எதிரான வழக்கில், ஆகம விதிப்படி அர்ச்சகர்களை நியமிக்க உச்சநீதி மன்றம் உத்தரவு
@ தில்லியில் மாசு அதிகரிப்பைத் தடுக்க புதிதாக டீசல் வாகனங்களை பதிவு செய்யக்கூடாது என தேசிய பசுமைத் தீர்ப்பாயம் உத்தரவு.
@ அன்னை தெராசாவிற்கு அடுத்த ஆண்டு புனிதர் பட்டம் வழங்க ரோமன் கத்தோலிக்க திருச்சபை முடிவு.
@ பிரபல எழுத்தாளரான விக்கிரமன் காலமானார்.
@ ஜப்பான் உதவியுடன் மும்பை – அகமதாபாத் இடையே புல்லட் ரயில் விடுவதற்கான ஒப்பந்தம், 98 ஆயிரம் கோடி ரூபாய் செலவில் கையெழுத்தானது.
@ எழுத்தாளர் ஆ. மாதவன் எழுதிய ‘இலக்கியச் சுவடுகள்’ என்ற நூல், 2014-ஆம் ஆண்டுக்கான சாகித்ய அகாதெமி விருது பெற தேர்வு செய்யப்பட்டுள்ளது.
@ சிறார் நீதி சட்டத் திருத்த மசோதா மாநிலங்களவையில் நிறைவேற்றம்- இதன்படி 16 வயதுக்கு மேற்பட்டோர் கொடுங்குற்றங்களில் ஈடுபட்டால், அவர்களுக்கும் கடும் தண்டனை வழங்கப்படும்.

நோபல் பரிசு - 2015

இலக்கியம்

பெலாரஸ் நாட்டு பெண் எழுத்தாளர் ஸ்வெட்லானா அலெக்ஸ்விச்சிற்கு இலக்கியத்திற்கான நோபல் பரிசு கிடைத்தது. இரண்டாம் உலகப்போர், ஆப்கானிஸ்தான் போர் உள்ளிட்ட போர்கள் குறித்தும், செர்னோபில் அணு உலை விபத்து பற்றியும் ஸ்வெட்லானா எழுதியுள்ளார். 67 வயதான ஸ்வெட்லானா, இலக்கியத்திற்கான நோபல் பரிசு பெறும் 14வது பெண்.

இயற்பியல்

இயற்பியல் துறையில் ஜப்பான் விஞ்ஞானி டகாகி கஜிடா மற்றும் கனடா நாட்டு விஞ்ஞானி ஆர்தர் பி.மெக்டொனால்ட் ஆகியோருக்கு  நியூட்ரினோ தொடர்பான ஆராய்ச்சிகளுக்காக  நோபல் பரிசு கிடைத்துள்ளது. 

வேதியியல்

மரபணுக்களில் கோளாறு ஏற்படும்போது அதனை நம் உடல் எவ்வாறு தானாகவே சரி செய்து கொள்கிறது என்பதைக் கண்டறிந்ததற்காக, வேதியியல் துறைக்கான நோபல் பரிசு  தாமஸ் லிண்டால், பால் மோட்ரிச், அஜீஸ் சான்சார் ஆகிய 3 பேருக்கு வழங்கப்படுகிறது. தாமஸ் லிண்டாஸ் சுவீடனையும், பால் மோட்ரிச் அமெரிக்காவையும் சேர்ந்தவர்கள். அஜீஸ் சான்சார் துருக்கியில் பிறந்து அமெரிக்காவில் வசிப்பவர். 

மருத்துவம்

வில்லியம் சி.கேம்பெல், சடோஷி ஓமுரா மற்றும் யுயு டு ஆகிய மூன்று பேருக்கு மருத்துவத்திற்கான நோபல் பரிசு  கிடைத்துள்ளது. யானைக்கால் நோய் மற்றும் மலேரியா நோய் சிகிச்சைக்கு மருந்து கண்டுபிடித்தமைக்காக இந்த விருது கொடுக்கப்பட்டுள்ளது. 

அமைதி

அமைதிக்கான நோபல் பரிசு  துனிஷியா நாட்டின் தேசிய பாதுகாப்பு பேச்சுவார்த்தைக் குழுவுக்கு கிடைத்துள்ளது. துனிஷியாவில் நடந்த புரட்சிக்குப் பிறகு ஜனநாயகத்தை ஏற்படுத்த பாடுபட்டதற்காக இந்த விருது தரப்பட்டுள்ளது. 

பொருளாதாரம்

பொருளாதாரத்துக்கான நோபல் பரிசு அமெரிக்காவில் பணியாற்றும் ஸ்காட்லாந்தைச் சேர்ந்த ஆங்கஸ் டீட்டனுக்கு வழங்கப்படுகிறது. நுகர்வு, வறுமை, சமூக நலம் ஆகியவைகள் குறித்த ஆய்வுக் கட்டுரைகளுக்காக இந்தப் பரிசு வழங்கப்படுகிறது.