தொடர்ந்து இதே தவறுகளைத்தான் செய்துவருகிறோம் - தோல்விக்கு பிறகு தோனி பேட்டி!

 

நேற்று துபாய் சர்வதேச கிரிக்கெட் ஸ்டேடியத்தில் நடைபெற்ற, 13வது  ஐபிஎல் தொடரிடன் 14-வது தகுதிச் சுற்று ஆட்டத்தில் சென்னை சூப்பர் கிங்ஸ் அணியும், சன் ரைஸர்ஸ் ஹைதராபாத் அணியும் மோதின.

தொடக்க ஆட்டத்தில் வெற்றி பெற்றிருந்தாலும் அடுத்தடுத்த ஆட்டங்களில் இரண்டு தோல்விகளைக் கண்டிருந்த சென்னை சூப்பர் கிங்ஸ் இப்போட்டியில் கட்டாயம் வெற்றி பெற்றே ஆகவேண்டும் என்ற எண்ணத்தோடு அணியில் சில மாற்றங்களைச் செய்தது.

கடந்த போட்டியில் விளையாடிய முரளி விஜய், ருதுராஜ் கெய்க்வாட், ஜோஷ் ஹேஸில்வுட் ஆகியோருக்கு பதிலாக அம்பதி ராயுடு, ஷர்துல் தாக்கூர், டிவெய்ன் பிராவோ ஆகியோர் களமிறங்கினர்.

ஹைதராபாத் அணியில் எந்த மாற்றமும் செய்யப்படவில்லை. டாஸ் வென்ற ஹைதராபாத் அணியின் கேப்டன் முதலில் பேட்டிங் செய்வதாக அறிவித்தார். டாஸ் வென்றிருந்தால் சென்னை அணி முதலில் பேட்டிங் செய்திருக்கும் என்று தோனியும் சொன்னார்.

ஹைதராபாத் அணியின்  தொடக்க வீரர்களான டேவிட் வார்னரும், ஜானி பேர்ஸ்ட்டோவும் களமிறங்கினர். தீபக் சஹார் வீசிய முதல் ஓவரிலேயே ரன் ஏதும் எடுக்காமல் ஸ்டம்புகளைப் பறிகொடுத்தார் பேர்ஸ்ட்டோ.

வார்னருடன் மணீஷ் பாண்டே ஜோடி சேர்ந்தார். இருவரும் பவர் பிளேவில் நிதானமாக ஆடி விக்கெட் விழாமல் பார்த்துக்கொண்டனர்.  மணீஷ் பாண்டே 29 ரன்கள் எடுத்திருந்தபோது ஷர்துல் தாக்கூரின் பந்துவீச்சில் சாம் கர்ரணிடம் கேட்ச் கொடுத்து வெளியேறினார். 7.1 ஓவரில் 2 விக்கெட்களை இழந்து 47 ரன்கள் எடுத்திருந்தது ஹைதராபாத். இவரையடுத்து வார்னருடன் கேன் வில்லியம்ஸன் ஜோடி சேர்ந்தார்.

பியூஷ் சாவ்லா வீசிய 10-வது ஓவரில் இரண்டு விக்கெட்டுகளை இழந்தது ஹைதராபாத்.  சாவ்லா வீசிய 5-வது பந்தை லாங் ஆன் திசையில் வார்னர் தூக்கி அடிக்க, எல்லைக்கோட்டுக்கு வெளியே சென்ற பந்தை அந்தரத்தில் பாய்ந்து பிடித்த பாப் டுபிளிஸிஸ், பந்தை மைதானத்திற்குள் தூக்கிப் போட்டுவிட்டு, எல்லைக்கோட்டிற்கு வெளியே குதித்தவர் மீண்டும் மைதானத்திற்குள் வந்து அந்த பந்தை பிடித்து ஆச்சர்யம் அளித்தார். அடுத்த பந்திலேயே, கேன் வில்லியம்ஸன் 9 ரன்கள் எடுத்திருந்தநிலையில், அம்பதி ராயுடுவின் அற்புதமான பீல்டிங்கால் ரன் அவுட் ஆனார்.

11 ஓவர் முடிவில் 4 விக்கெட்டுகளை இழந்து 69 ரன்கள் எடுத்து தடுமாறிக்கொண்டிருந்தது ஹைதராபாத். இவர்களையடுத்து ஹைதராபாத்தின் இளம் வீரர்களான பிரியம் கார்க், அபிஷேக் சர்மா ஆகியோர் கூட்டணி அமைத்து அணியை சரிவிலிருந்து மீட்க ஆரம்பித்தனர்.

16வது ஓவர் முடிவில் ஹைதராபாத் அணி 111 ரன்கள் எடுத்திருந்தது. ஆரம்பத்தில் நிதானம் காட்டிய பிரியம் கார்க் போகப்போகஅதிரடிக்கு மாறினார். சாம் கர்ரண் வீசிய  17-வது ஓவரில் மூன்று பவுண்டரிகள், ஒரு சிக்ஸர் என ரன் மழை பொழிந்தார் பிரியம் கார்க். அந்த ஓவரில் மட்டும் 22 ரன்கள் கிடைத்தது.

17-வது ஓவரை தீபக் சஹார் வீச, அந்த ஓவரில் அபிஷேக் சர்மா கொடுத்த இரண்டு கேட்ச் வாய்ப்புகளை ஜடேஜாவும், தாக்கூரும் தவறவிட்டு ஏமாற்றமளித்தனர். அதே ஓவரின் கடைசி பந்தில் விக்கெட் கீப்பர் தோனியிடம் கேட்ச் கொடுத்து வெளியேறினார் அபிஷேக் சர்மா. அவர் 24 பந்துகளில் 1 சிக்ஸர், 4 பவுண்டரிகளுடன் 31 ரன்கள் எடுத்திருந்தார்.

அதிரடியாக ஆடிய பிரியம் கார்க் 23 பந்துகளில் ஐபிஎல் தொடரில் தனது முதலாவது அரை சதத்தைப் பதிவு செய்தார். 20 ஓவர் முடிவில் ஹைதராபாத் அணி 5 விக்கெட் இழப்பிற்கு 164 ரன்கள் குவித்தது. 

பிரியம் கார்க் 51 ரன்களுடனும் அப்துல் சமது 8 ரன்களுடனும் கடைசி வரை ஆட்டமிழக்காமல் இருந்தனர்.

165 ரன்கள் எடுத்தால் வெற்றி என்ற இலக்குடன் ஆடிய சென்னை அணிக்கு ஆரம்பமே அதிர்ச்சியாக இருந்தது. புவனேஷ்குமாரின் அற்புதமான வேகப்பந்துவீச்சில் ஷேன் வாட்ஸன் 1 ரன் எடுத்திருந்தபோது ஸ்டம்புகளைப் பறிகொடுத்து ஆட்டமிழந்தார்.

அடுத்து பாப் டுபிளிஸிஸுடன் அம்பதி ராயுடு ஜோடி சேர்ந்தார். ராயுடுவும் நிலைக்கவில்லை. 8 ரன்கள் எடுத்திருந்தபோது, நடராஜனின் பந்துவீச்சில் ஸ்டம்புகளைப் பறிகொடுத்தார். இவரையடுத்து பாப் டுபிளிஸிஸுடன் கேதர் ஜாதவ் ஜோடி சேர்ந்தார். பாப் டுபிளிஸிஸ் 22 ரன்கள் எடுத்திருந்தபோது பிரியம் கார்க்கினால் ரன் அவுட் செய்யப்பட்டார்.

ஜாதவுடன் கேப்டன் தோனி ஜோடி சேர்ந்தார். மிகவும் மந்தமாக ஆடிய கேதர் ஜாதவ் 10 பந்துகளைச் சந்தித்து 3 ரன்கள் மட்டுமே எடுத்திருந்தபோது, அப்துல் சமது பந்துவீச்சில் டேவிட் வார்னரிடம் கேட்ச் கொடுத்து வெளியேறினார். அவர் ஆட்டமிழந்தபோது சென்னை அணி 8.2 ஓவரில் 4 விக்கெட் இழப்பிற்கு 42 ரன்கள் மட்டுமே எடுத்து தடுமாறிக் கொண்டிருந்தது.

தோனியுடன் ரவீந்திர ஜடோஜா ஜோடி சேர்ந்தார். நடுப்பகுதி ஓவரை ரஷீத் கான் வீசினார். அவர் வீசிய 4 ஓவர்களில் 12 ரன்கள் மட்டுமே விட்டுக்கொடுத்து, சென்னை அணியின் ரன்குவிப்பை மேலும் மட்டுப்படுத்தினார். இதன் விளைவாக சென்னை அணி 17-வது ஓவரில்தான் 100 ரன்களையே எட்ட முடிந்தது. அதன் பிறகு தோனியும் மறுபுறம் ஜடேஜாவும் எதிரணியின் பந்துவீச்சை அடித்து ஆட ஆரம்பித்தனர். 34 பந்துகளில் 2 சிக்ஸர்கள் 5 பவுண்டரிகள் விளாசிய ரவீந்திர ஜடேஜா ஐபிஎல் தொடரில் தனது முதல் அரைசதத்தை பதிவு செய்த அடுத்த பந்திலேயே தனது விக்கெட்டைப் பறிகொடுத்தார். இவரது விக்கெட்டை நடராஜன் வீழ்த்தினார். 

தோனியுடன் கை கோர்த்த டாம் கர்ரண், தான் சந்தித்த முதல் பந்தை சிக்ஸருக்கு விரட்டினார். 18 ஓவர் முடிவில் சென்னை அணி 5 விக்கெட் இழப்பிற்கு 121 ரன்கள் எடுத்திருந்தது. 12 பந்துகளில் 44 ரன்கள் எடுத்தால் வெற்றி என்ற நிலை.

19வது ஓவரை புவனேஷ்வர் குமார் வீசினார். முதல் பந்தினை வீசியபோது, தொடையில் தசைப்பிடிப்பு ஏற்படவே, மைதானத்தில் இருந்து வெளியேறினார். அந்த ஓவரை கலீல் அஹமது வீச, ஒரு சிக்ஸர், ஒரு பவுண்டரி உள்பட 15 ரன்களை விளாசினார் தோனி.

கடைசி ஓவரில் 28 ரன்கள் எடுத்தால் வெற்றி என்ற கடினமான நிலை. அப்துல் சமது வீசிய முதல் பந்து வைடாகப்போக, கீப்பர் பிடிக்கத் தவறியதால் 5 ரன்கள் சென்னை அணிக்கு கிடைத்தது.

6 பந்துகளில் 23 ரன்கள் தேவை. முதல் பந்தில் 2 ரன்களும், இரண்டாவது பந்தில் பவுண்டரியும் விளாசிய தோனியால் அடுத்த பந்தில் ஒரு ரன் மட்டுமே எடுக்க முடிந்தது. அடுத்த இரு பந்துகளில் இரண்டு ரன்கள் கிடைக்க, கடைசி பந்தை சிக்ஸருக்கு விரட்டி ஆறுதல் அளித்தார் சாம் கர்ரண். கடைசி வரை போராடிய சென்னை அணி 20 ஓவர் முடிவில் 157 ரன்கள் எடுத்து 7 ரன்களில் தோல்வியைத் தழுவியது. தோனி 36 பந்துகளில் 47 ரன்களுடனும், சாம் கர்ரண் 5 பந்துகளில் 15 ரன்களுடனும் களத்தில் ஆட்டமிழக்காமல் இருந்தனர். 

அதிரடியாக ஆடி அணிக்கு வெற்றி தேடித்தந்த ப்ரியம் கார்க் ஆட்ட நாயகனாக தேர்வு செய்யப்பட்டார்.

தோல்விக்குப் பிறகு சென்னை அணியின் கேப்டன் தோனி  "முதலில் பேட்டிங் செய்யத்தான் தீர்மானித்திருந்தோம். டாஸ் தோல்வியால் அது நடக்கவில்லை. பந்துவீச்சின்போது, நோல் பால் வீசியதும்,  பீல்டிங்கில் செய்த தவறுகளும், கேட்ச்களை தவறவிட்டதும் தோல்விக்கு முக்கிய காரணம். தொடர்ந்து இதே தவறுகளைத்தான் செய்துவருகிறோம். இதை சரிசெய்தாக வேண்டும். 15 ஓவர்கள் வரை கட்டுக்கோப்பாகத்தான் பந்து வீசினோம். இரண்டு ஓவர்கள் மட்டும் மோசமாக அமைந்துவிட்டது.  பேட்டிங்கில் தொடக்கவரிசை ஆட்டக்காரர்கள் சரியாக ஆடவில்லை. ஆட்டத்தின் நடுவரிசை ஓவர்களில் ரன்கள் குவிக்கத் தவறிவிட்டோம். தொடர்ச்சியாக நாங்கள் மூன்று போட்டிகளில் தோல்வியடைந்தது கிடையாது. தவறுகளை சரிசெய்து கொண்டு மீண்டு வருவோம். இன்னும் போட்டிகள் இருக்கின்றன" என்றார்.

ஹைதராபாத் அணியின் சுழற்பந்து வீச்சாளர் ரஷீத் கான் "விக்கெட்டுகளை வீழ்த்த வேண்டும் என்ற எண்ணத்தில் பந்து வீசவில்லை. சரியான திசையில், சரியான வேகத்தில் வீசினால் போதும் என்று நினைத்து, செயல்படுத்தினேன். அதனால்தான் 4 ஓவர்களில் 12 ரன்கள் மட்டுமே விட்டுக்கொடுக்க முடிந்தது. இது பேட்ஸ்மேன்களுக்கு நெருக்கடியைத் தந்தது. மற்ற பந்துவீச்சளர்களிடம் அவர்கள் விக்கெட்டை பறிகொடுக்க நான் கொடுத்த நெருக்கடியும் ஒரு காரணம்" என்றார்.

மேன் ஆப் தி மேட்ச் விருது பெற்ற ஹைதராபாத் அணியின் ப்ரியம் கார்க் "மிகவும் சந்தோஷமாக இருக்கிறேன். இது எனக்கு மிகப்பெரிய களம். உலகத்தரம் வாய்ந்த மூத்த வீரர்களுடன் இணைந்து விளையாடுவது என்பது சாதாரண விஷயம் இல்லை. முதல் போட்டியில் நான் சரியாக ஆடவில்லை என்றாலும், அணி நிர்வாகம் என் மீது வைத்த நம்பிக்கையை இப்போது காப்பாற்றி இருக்கிறேன். எனது இயல்பான ஆட்டத்தைத்தான் விளையாடினேன். அபிஷேக்குடன் சிறுவயது முதலே கிரிக்கெட் விளையாடி வருவதால் அருடன் பார்ட்னர்ஷிப் அமைத்ததும் சிறப்பானதாக இருந்தது. இந்த வெற்றி என்னுள் மேலும் தன்னம்பிக்கையை விதைத்திருக்கிறது. அடுத்தடுத்த போட்டிகளில் இதை மேலும் வளர்த்துக்கொள்வேன்" என்றார்.

வெற்றிக்குப் பிறகு ஹைதராபாத் அணியின் கேப்டன் டேவிட் வார்னர் "புவனேஷ்குமார் தசைபிடிப்பால் களத்தில் இருந்து வெளியேறும்போது, அடுத்து  யாரிடம் பந்தைக் கொடுப்பது என்று யோசித்தேன். 5 பந்துகளில் ஆட்டம் எப்படி வேண்டுமானாலும் மாறிவிடும். அபிஷேக்கை விட, கலீல் அஹமது உயரமானவர், பந்துவீச்சும் சிறப்பாக இருக்கும் என்று கருதி அவரிடமே கொடுத்தேன். அவரால் முடிந்த அளவு சிறப்பாக பந்துவீசினார். தொடக்கத்தில் இந்த பிட்ச் ஸ்விங்கிற்கு நன்றாக ஒத்துழைத்தது. போகப்போக அதன் தன்மை மாறியது. கடினமான நேரங்களில் உங்கள் திறமையை வெளிக்காட்டினால்தான் வாய்ப்புகள்  அனைத்தும் வெற்றியாகும் என்று எனது அணியின் இளம் வீரர்களிடம் அடிக்கடி சொல்லுவேன். அதைத்தான் இப்போட்டியில் செய்து காட்டி இருக்கிறார்கள். யார்க்கர், ஸ்லோயர் பால் என பந்துவீச்சில் சிறப்பாக செயல்பட்டனர். வெற்றி பெற்றிருக்கிறோம்" என்றார்.

இந்த வெற்றியின் மூலம் 2 புள்ளிகள் பெற்ற ஹைதராபாத் அணி, தரவரிசைப் பட்டியலில் 4 புள்ளிகளுடன் 4-வது இடத்திற்கு முன்னேறியுள்ளது. தொடர் தோல்விகளால் 2 புள்ளிகளுடன் கடைசி இடத்தை தக்க வைத்துக்கொண்டது சென்னை சூப்பர் கிங்ஸ்.

இப்போட்டியில் மகேந்திர சிங் தோனி 4500 ரன்கள் கடந்த வீரர் என்ற சாதனையைப் படைத்தார். சென்னை அணியின் தோல்வியால் இந்த சாதனை அமுங்கிப்போனது என்றே சொல்ல வேண்டும்.

இன்று முதல் சனி, ஞாயிறுகளில் இரண்டு தகுதிச்சுற்று போட்டிகள் நடைபெற இருக்கின்றன.

இன்றைய ஆட்டங்களில் ராயல் சேலஞ்சர்ஸ் பெங்களூரு அணி ராஜஸ்தான் அணியையும், டெல்லி கேபிடல்ஸ் அணி கொல்கத்தா நைட் ரைடர்ஸ் அணியையும் எதிர்த்து ஆடுகின்றன.

#ஐபிஎல்2020 #IPL_2020 #dhoni_records

பஞ்சாப் அணியை சிதறடித்த மும்பை இந்தியன்ஸ்! - ரோஹித், பொல்லார்டு, ஹர்திக் அதிரடி!

மோ.கணேசன்

நேற்று, அபுதாபியில் உள்ள ஷேக் சையது சர்வதேச கிரிக்கெட் மைதானத்தில் நடைபெற்ற 13-வது ஐபிஎல் தொடரின் 13-வது தகுதிச்சுற்று ஆட்டத்தில், மும்பை இந்தியன்ஸ் அணியும், கிங்ஸ் லெவன் பஞ்சாப் அணியும் மோதின.

பஞ்சாப் அணி இரண்டு வெற்றி, ஒரு தோல்வியுடன் இருந்த நிலையில் இப்போட்டியில் வெற்றி பெற வேண்டும் என்ற நோக்கத்தில் களமிறங்கியது. மும்பை இந்தியன்ஸ் அணி ஒரு வெற்றி, இரண்டு தோல்விகளுடன் கட்டாயம் வெற்றி பெற்றாக வேண்டும் என்ற நோக்கத்தில் களமிறங்கியது.

டாஸ் வென்ற பஞ்சாப் அணி முதலில் பீல்டிங் செய்வதாக அறிவித்தது. மும்பை அணியில் மாற்றம் எதுவும் செய்யப்படவில்லை. பஞ்சாப் அணியில் மட்டும் கடந்த போட்டியில் விளையாடிய அஸ்வின் நீக்கப்பட்டு, கிருஷ்ணப்பா கவுதம் அணியில் சேர்க்கப்பட்டார்.

மும்பை இந்தியன்ஸ் அணியின் தொடக்க வீரர்களாக குவின்டன் டி காக்கும், ரோஹித் சர்மாவும் களமிறங்கினர். முதல் ஓவரை வீசிய ஷெல்டன் கார்ட்டெலின் துல்லியமான வேகப்பந்து வீச்சில் டிகாக், ரன் ஏதும் எடுக்காமலேயே ஸ்டம்புகளைப் பறிகொடுத்து ஆட்டமிழந்தார். முதல் ஓவர் மெய்டெனாக முடிந்தது. இந்த ஐபிஎல் தொடரில் ஒரு விக்கெட்டுட்டுடன் முதல் மெய்டென் ஓவர் இதுவாகத்தான் இருக்கும்.

இவரையடுத்து ரோஹித் சர்மாவுடன், சூர்யகுமார் யாதவ் ஜோடி சேர்ந்தார். இரண்டாவது ஓவரை முகமது ஷமி வீச, அந்த ஓவரின் முதல் பந்திலேயே பவுண்டரியை பறக்கவிட்ட ரோஹித் சர்மா, ஐபிஎல் தொடர்களில் 5000 ரன்களைக் கடந்தார். அதே ஓவரில் மீண்டும் ஒரு பவுண்டரியை விரட்டினார். அந்த ஓவரின் கடைசி பந்தில் எல்பிடபிள்யூ முறையில் ஆட்டமிழந்ததாக நடுவர் அறிவிக்க, டிஆர் எஸ் ரிவியூ முறையில் தப்பித்தார்  ரோஹித் சர்மா.

கார்ட்டெல் வீசிய 2 வது ஓவரில் இரண்டு பவுண்டரிகளை விரட்டிய சூர்யகுமார் யாதவ், ரவி பிஷ்னோய் வீசிய முதல் ஓவரின் 5 வது பந்தில், 10 ரன்கள் எடுத்திருந்த நிலையில், ஷமியின் அற்புதமான பீல்டிங்கால் ரன் அவுட் ஆனார்.

ரோஹித் சர்மாவுடன் இஷான் கிஸான் ஜோடி சேர்ந்தார். 13 ஓவர் வரையிலும் கிஸான் மிக நிதானமாக ஆடினர். ரோஹித் சர்மா அவ்வப்போது பவுண்டரிகளை அடிக்க, அணியின் எண்ணிக்கை மெதுவாக உயர்ந்தது.

13 ஓவர் முடிவில் 2 விக்கெட் இழப்பிற்கு 83 ரன்கள் மட்டுமே மும்பை அணி எடுத்திருந்தது. 14-வது ஓவரை கிருஷ்ணப்பா கௌதம் வீசினார். அவர் வீசிய முதல் பந்தினை டீப் மிட்விக்கெட் திசையில் தூக்கி அடிக்க, கருண் நாயர் கையில் தஞ்சமடைந்தது. இஷான் கிஸான் கணக்கில் 1 பவுண்டரி, 1 சிக்ஸ் உள்பட 32 பந்துகளில் 28 ரன்கள் அடங்கும். 

அடுத்து பொல்லார்டு ரோஹித்துடன் ஜோடி சேர்ந்தார். 14 ஓவரில் மும்பை அணி 3 விக்கெட் இழப்பிற்கு 87 ரன்கள் எடுத்தது. 15 ஓவரில் இருந்து இருவரும் விஸ்வரூபம் எடுத்தனர் என்றே சொல்லவேண்டும். மைதானாத்தின் நாலாபுறமும் சிக்ஸர்களாகவும் பவுண்டரிகளாகவும் பறக்க விட, ஆமை வேகத்தில் இருந்த ரன் விகிதம், ராக்கெட் வேகத்தில் எகிறத் தொடங்கியது.

16-வது ஓவரை ஜிம்மி நீஷம் வீச, அந்த ஓவரில் முதல் பவுண்டரியை விரட்டிய ரோஹித் சர்மா அரை சதத்தை எட்டினார். அதனை அடுத்து தொடர்ச்சியாக ஒரு பவுண்டரி, இரண்டு சிக்ஸர்கள் விளாசி எதிரணியை கலங்கடித்தார்.

17-வது ஓவரை முகமது ஷமி வீச, அவர் வீசிய முதல் பந்தை ரோஹித் சர்மா லாங் ஆன் திசையில் சிக்ஸருக்கு தூக்கி அடித்தார். சிக்ஸருக்கு போன பந்தை ஓடி வந்த வேகத்தில் பாய்ந்து பிடித்த கிளென் மேக்ஸ்வெல், எல்லைக்கோட்டுக்கு வெளியே செல்லும் முன்னர் அருகில் இருந்த ஜிம்மி நீஷமிடம் தூக்கிப்போட, அவர் கச்சிதமாகப் பிடித்து, ரோஹித் சர்மாவை வெளியேற்றினார். மேக்ஸ்வெல்லின் அட்டகாசமான பீல்டிங்கை பாராட்டியே ஆகவேண்டும். ரோஹித் ஆட்டமிழந்தபோது அணியின் எண்ணிக்கை 16.1 ஓவரில் 4 விக்கெட்டுகளை இழந்து 124 ரன்களாக இருந்தது.

பொல்லார்டுடன் ஹர்திக் பாண்டியா இணைய, வாண வேடிக்கை இருவரிடமிருந்தும் கிளம்பியது. யார் போட்டாலும் வாணவேடிக்கைதான்.  முகமது ஷமி வீசிய 19வது ஓவரில் பாண்டியா ஒரு பவுண்டரியும், பொல்லார்டு 3 பவுண்டரிகளையும் அடித்தனர். 20-வது ஓவரை கிருஷ்ணப்பா கவுதம் சுழற்பந்து வீச, பொல்லார்டுக்கு வசதியாகப் போனது. அந்த ஓவரில் மட்டும் நான்கு சிக்ஸர்களைப் பறக்க விட்டு, அணியின் எண்ணிக்கையை ராக்கெட் வேகத்தில் உயர்த்தினார்.

15 ஓவர் வரை தடுமாறிக் கொண்டிருந்த மும்பை அணி 20 ஓவர் முடிவில் மும்பை அணி 4 விக்கெட் இழப்பிற்கு 191 ரன்கள் குவித்து அசத்தியது. பொல்லார்டு 20 பந்துகளை எதிர்கொண்டு 4 சிக்ஸர்கள் 3 பவுண்டரிகள் உள்பட 47 ரன்களுடனும், ஹர்திக் பாண்டியா தன் பங்கிற்கு 11 பந்துகளில் 2 சிக்ஸர்கள் 3 பவுண்டரிகள் உள்பட 30 ரன்கள் குவித்து கடைசி வரை ஆட்டமிழக்காமல் இருந்தனர். இவர்கள் இருவர் மட்டுமே 31 பந்துகளை சந்தித்து 77 ரன்கள் குவித்தனர்.

இதனையடுத்து 120 பந்துகளில் 192 ரன்கள் எடுத்தால் வெற்றி என்ற கடினமான இலக்குடன் களமிறங்கிய பஞ்சாப் அணியினை, மும்பை இந்தியன்ஸ் அணியின் பந்துவீச்சாளர்கள் பஞ்சாய்ப் பறக்க வைத்தனர்.

தொடக்க ஆட்டக்காரகளாக களமிறங்கிய அணியின் கேப்டனான கே.எல்.ராகுல் 17 ரன்களுக்கும், மயங்க் அகர்வால் 25 ரன்களிலும் ஆட்டமிழந்து ஏமாற்றமளித்தனர். இவரை அடுத்து வந்த கருண் நாயர் ரன் ஏதும் எடுக்காமலேயே ஆட்டமிழந்து அதிர்ச்சி அளித்தார். பஞ்சாப் அணியில் அதிகபட்சமாக நிக்கோலஸ் பூரன் 44 ரன்கள் எடுத்தார். கிருஷ்ணப்பா கவுதம் 22 ரன்கள் எடுத்தார். மற்றவர்கள் அனைவரும் சொற்ப ரன்களில் ஆட்டமிழக்க 20 ஓவர் முடிவில் பஞ்சாப் அணி 8 விக்கெட்டுகளை இழந்து 143 ரன்கள் மட்டுமே எடுத்தது.

இதனால் மும்பை இந்தியன்ஸ் அணி 48 ரன்கள் வித்தியாசத்தில் வெற்றி பெற்றது. 

ஆட்டநாயகனாக மும்பை அணியின் கிரென் பொல்லார்டு தேர்வு செய்யப்பட்டார்.

தோல்விக்குப் பிறகு பஞ்சாப் அணியின் கேப்டன் கே.எல்.ராகுல் "இந்த தோல்வி எங்களை நெருக்கடிக்குள்ளாக்கும் என்று சொல்லமாட்டேன். ஆனால் வருத்தமடைய வைத்திருக்கிறது. முதல் 15 ஓவர்கள் மிகச்சிறப்பாகவே பந்து வீசினோம். கடைசி 5 ஓவர்கள்தான் மோசமாகப் போய்விட்டது. கூடுதலாக ஒரு பந்து வீச்சாளர் தேவை என்பதை உணர்கிறோம். தோல்வியிலிருந்து புதிய உத்வேகத்துடன் மீண்டு வருவோம். இன்னும் நிறைய போட்டிகள் இருக்கின்றன" என்றார்.

வெற்றிக்குப் பிறகு மும்பை இந்தியன்ஸ் அணியின் கேப்டன் ரோஹித் சர்மா "சிறப்பான வெற்றி. பஞ்சாப் அணியின் பலம் எங்களுக்குத் தெரியும். முதலில் விக்கெட் விழாமல் நிலைத்து நின்று ஆடினால் போதும். கடைசி 5 ஓவர்களில் பார்த்துக் கொள்ளலாம் என்று திட்டமிட்டிருந்தோம். அதை கனகச்சிதமாக பொல்லார்டும், பாண்டியாவும் செய்து முடித்தார்கள். பந்து வீச்சாளர்களும் தங்களது பணியை கனகச்சிதமாக செய்து முடித்தார்கள். இதுதான் கேப்டனுக்குத் தேவை. 5000 ரன்களைக் கடந்தது மகிழ்ச்சியாக இருக்கிறது. என்னுடைய எண்ணிக்கை எனக்கு முக்கியமில்லை. அணியின் வெற்றியே முக்கியம்" என்றார்.

மேன் ஆப் தி மேட்ச் விருது பெற்ற கிரென் பொல்லார்ட் "மகிழ்ச்சியாக இருக்கிறது. 15 ஓவர்களுக்குப் பிறகு அடித்து ஆட வேண்டும் என்று திட்டமிட்டிருந்தோம். காரணம் சுழற்பந்து வீச்சாளர்களின் ஓவர்கள் மிச்சமிருந்தது. பயன்படுத்திக்கொண்டோம். பாண்டியாவின் அதிரடியும் அணிக்கு கை கொடுத்தது. சென்ற போட்டியில் தோல்வியடைந்திருந்தோம். அதில் இருந்த மீளவேண்டும் என்ற உத்வேகம், இந்த போட்டியில் வெற்றியைத் தந்திருக்கிறது. இனி வரும் போட்டிகளிலும் இது தொடரும்" என்றார்.

இந்த வெற்றியின் மூலம் கிடைத்த இரண்டு புள்ளிகளுடன் மொத்தம் நான்கு புள்ளிகளோடு தரவரிசைப் பட்டியலில் முதலிடம் பிடித்தது மும்பை அணி.பஞ்சாப் அணி தோல்வியைத் தழுவியதால் 2 புள்ளிகளோடு ஆறாவது இடத்திற்கு தள்ளப்பட்டது.

இன்று நடைபெறும் 14-வது தகுதிச் சுற்று ஆட்டத்தில் சென்னை சூப்பர் கிங்ஸ் அணியுன் சன்ரைஸர்ஸ் ஹைதராபாத் அணி மோதுகிறது.

ipl2020 #MI_vs_KXIP #rohith_5000_runs, #ஐபிஎல்2020

கொல்கத்தாவுக்கு இரண்டாவது வெற்றி - ராஜஸ்தானுக்கு முதல் தோல்வி!

மோ.கணேசன்

நேற்று துபாய் சர்வதேச கிரிக்கெட் ஸ்டேடியத்தில் நடைபெற்ற, ஐபிஎல் தொடரின் 12-வது தகுதிச்சுற்று ஆட்டத்தில் கொல்கத்தா நைட் ரைடர்ஸ் அணியும், ராஜஸ்தான் ராயல்ஸ் அணியும் மோதின.

இரண்டு வெற்றியைப் பெற்ற தெம்புடன் ராஜஸ்தான் அணியும், முதல் போட்டியில் தோல்வியைக்கண்டாலும் இரண்டாவது போட்டியில் வெற்றிபெற்ற நம்பிக்கையில் கொல்கத்தாவும் களமிறங்கின.

கொல்கத்தா அணியிலும், ராஜஸ்தான் அணியிலும் எந்த மாற்றமும் செய்யப்படவில்லை. கடந்த போட்டியில் விளையாடிய வீரர்களே இந்த போட்டியிலும் இடம் பெற்றனர்.

டாஸ் வென்ற ராஜஸ்தான் அணியின் கேப்டன் ஸ்டீவ் ஸ்மித், பந்து வீச்சை தேர்வு செய்தார்.

இதனையடுத்து, கொல்கத்தா அணி முதலில் பேட்டிங்கைத் தொடங்கியது. அதன் தொடக்க ஆட்டக்காரர்களாக சுனில் நரைன், சுப்மன் கில் ஆகியோர் களமிறங்கினர். முதல் ஓவரை ஜோப்ரா ஆர்ச்சர் நேர்த்தியாக வீச அந்த ஓவரில் ஒரு ரன் மட்டுமே எடுக்க முடிந்தது.

ஆட்டத்தின் மூன்றாவது ஓவரை ஜெயதேவ் உனத்கட் வீச, அந்த ஓவரில் சுனில் நரைன் கொடுத்த எளிதான கேட்ச்சைக் கோட்டைவிட்டார் ராபின் உத்தப்பா. அதன் பலனாக ஐந்தாவது ஓவரை உனத்கட் வீசும்போது, டீப் மிட்விக்கெட் திசையில் ஒரு சிக்ஸரும், எக்ஸ்ட்ரா கவர் திசையில் ஒரு பவுண்டரியும் விளாசினார் சுனில் நரைன். அடுத்த பந்திலேயே ஸ்டம்புகளை தெறிக்கவிட்டு பழிதீர்த்துக்கொண்டார் உனத்கட்.

இவரையடுத்து சுப்மன் கில்லுடன் நிதீஷ் ராணா ஜோடி சேர்ந்தார். இருவரும் நிதானமாக ஆடி அணியின் ஸ்கோரை மெல்ல மெல்ல உயர்த்தினர். அவ்வப்போது அடித்து விளையாடிய நிதீஷ் ராணா 17 பந்துகளில் 2 பவுண்டரிகள், ஒரு சிக்ஸர் உள்பட 22 ரன்கள் எடுத்திருந்தபோது திவேட்டியா பந்துவீச்சில் ரியான் பராக்கிடம் கேட்ச் கொடுத்து வெளியேறினார். 

சுப்மன் கில்லுடன் ஆந்த்ரே ரஸ்ஸல் ஜோடி சேர்ந்து அதிரடியாக ஆட ஆரம்பித்தார். அதுவும் நிலைக்கவில்லை. 12 ஓவரின் தொடக்கத்தில் ஜோப்ரா ஆர்ச்சர் பந்துவீச்சில் அவரிடமே கேட்ச்கொடுத்து வெளியேறினார் சுப்மன் கில். 34 பந்துகளில் 1 சிக்ஸ் 5 பவுண்டரிகள் உள்பட 47 ரன்கள் அவரது கணக்கில் அடங்கும். 

அடுத்து வந்த கேப்டன் தினேஷ் கார்த்திக்கும் நிலைக்கவில்லை. ஜோப்ரா ஆர்ச்சரின் அற்புதமான பந்துவீச்சில் 1 ரன் எடுத்திருந்த நிலையில், விக்கெட் கீப்பரான ஜாஸ் பட்லரிடம் கேட்ச் கொடுத்து வெளியேறினார். ஆந்த்ரே ரஸ்ஸல் 14 பந்துகளில் 3 சிக்ஸர்கள் உள்பட 24 ரன்கள் எடுத்திருந்தபோது அங்கிட் ராஜ்புத் பந்துவீச்சில் உனத்கட்டிடம் கேட்ச் கொடுத்து வெளியேறினார்.

அடுத்து களமிறங்கிய பேட் கம்மின்ஸ் 12 ரன்களில்  ஆட்டமிழக்க,  இயான் மோர்கன் தன் பங்கிற்கு 34 ரன்கள் விளாச, கமலேஷ் நாகர்கோட்டி 8 ரன்கள் அடித்திருந்த போது ஆட்டம் முடிவுக்கு வந்தது. சீரான இடைவெளியில் கொல்கத்தா அணி விக்கெட்டுகளை இழந்தாலும், தினேஷ் கார்த்திக்கைத் தவிர மற்ற அனைவரும் தங்களது பங்கை சிறப்பாகச் செய்ததால் 20 ஓவரின் முடிவில் கொல்கத்தா அணி 6 விக்கெட் இழப்பிற்கு 174 ரன்கள் எடுத்திருந்தது. 

175 ரன்கள் எடுத்தால் வெற்றி என்ற கடின இலக்குடன் பேட்செய்யத் தொடங்கிய ராஜஸ்தான் ராயல்ஸ் அணிக்கு தொடக்கத்திலேயே அதிர்ச்சி காத்துக்கொண்டிருந்தது.

தொடக்க வீரராகக் களமிறங்கிய ராஜஸ்தான் அணியின் கேப்டன் ஸ்டீவ் ஸ்மித் 3 ரன்கள் எடுத்திருந்தபோது, பேட் கம்மின்ஸின் அற்புதமான வேகப்பந்துவீச்சில் விக்கெட் கீப்பரான தினேஷ் கார்த்திக்கிடம் கேட்ச் கொடுத்து வெளியேறினார்.

அடுத்து சஞ்சு சாம்சன் ஜாஸ் பட்லருடன் கைகோர்த்தார். சஞ்சு சாம்சன் 8 ரன்கள் எடுத்திருந்தபோதும், பட்லர் 21 ரன்கள் எடுத்திருந்தபோதும் ஷிவம் மாவியின் வேகப்பந்துவீச்சுக்கு பலியானார்கள். அடுத்து வந்த பேட்ஸ்மேன்களான ராபின் உத்தப்பா 2 ரன்கள் எடுத்திருந்தபோதும், ரியான் பராக் 1 ரன் எடுத்திருந்தபோதும் நாகர்கோட்டியின் பந்துவீச்சில் ஆட்டமிழந்தனர்.

கடந்த போட்டியில் ஆட்டத்தையே மாற்றிக்காட்டிய ராகுல் திவேட்டியா இப்போட்டியில் 14 ரன்கள் எடுத்திருந்தபோது வருண் பந்துவீச்சில் ஸ்டம்புகளைப் பறிகொடுத்து ஆட்டமிழந்தார். அப்போது ராஜஸ்தான் அணி 10.5 ஓவரில் 66 ரன்கள் எடுப்பதற்குள் 6 விக்கெட்டுகளை இழந்து தடுமாறியது.

அடுத்து களமிறங்கிய டாம் கரண் ஒரு புறம் நிலைத்து நின்று வாணவேடிக்கை காட்டினாலும், மறுபுறம் வந்த வீரர்கள் அனைவரும் கொல்கத்தா அணியின் நேர்த்தியான பந்துவீச்சால் சீட்டுக்கட்டுகளைப் போல் சரிந்தனர்.

20 ஓவர் முடிவில் 9 விக்கெட் இழப்பிற்கு 137 ரன்களை மட்டுமே ராஜஸ்தான் அணி எடுத்ததால், கொல்கத்தா அணி 37 ரன்கள் வித்தியாசத்தில் அபார வெற்றி பெற்றது. ராஜஸ்தான் அணியின் டாம் கரண் 36 பந்துகளில் 3 சிக்ஸர்கள், 2 பவுண்டரிகளுடன் 54 ரன்களுடன் ஆட்டமிழக்காமல் இருந்தார்.

கொல்கத்தா அணி சார்பில் சுனில் நரைன், பேட் கம்மின்ஸ்,  குல்தீப் யாதவ் ஆகியோர் தலா 1 விக்கெட்டினையும், வருண், நாகர்கோட்டி, ஷிவம் மாவி ஆகியோர் தலா 2 விக்கெட்டுகளையும் வீழ்த்தினர்.

தோல்விக்குப்பிறகு பேட்டியளித்த ஸ்டீவ் ஸ்மித்  “திட்டமிட்டபடி எங்களால் செயல்பட முடியவில்லை. தொடக்கத்திலேயே நாங்கள் அடுத்தடுத்து விக்கெட்டுகளை இழந்துவிட்டோம். எதிரணியினர் மிகச்சிறப்பாக விளையாடினர். களத்திற்கு ஏற்றபடி எங்களை மாற்றிக்கொள்ளவில்லை. இனிவரும் போட்டிகளில் சரி செய்து கொள்வோம்.” என்றார்.

வெற்றிக்குப்பிறகு பேட்டியளித்த தினேஷ் கார்த்திக்  “இது சிறந்தபோட்டி என்று சொல்ல மாட்டேன். பல விஷயங்களில் இன்னும் எங்களை மாற்றிக்கொள்ள வேண்டியிருக்கிறது. சுப்மன் கில், ரஸ்ஸல், இயான் மோர்கன் ஆகியோரின் பங்களிப்பு பிரமாதமாக இருந்தது. ஆர்ச்சர் அற்புதமாக பந்துவீசினார். டாஸ் நாங்கள் வென்றிருந்தால் முதலில் பேட்டிங்கைத்தான் தேர்வு செய்திருப்போம். அதிக ரன்களைக் குவித்து, பின் எதிரணியை கட்டுப்படுத்துவதுதான் எங்களது திட்டமாக இருந்தது. இளம் வீரர்களின் பங்களிப்பு சிறப்பாக இருந்தது” என்றார்.

மேன் ஆப் தி மேட்ச் விருது கொல்கத்தா அணியின் பந்துவீச்சாளரான ஷிவம் மாவிக்கு வழங்கப்பட்டது.

சிறப்பாக ஆடி இரண்டாவது வெற்றியைப் பதிவு செய்த  கொல்கத்தா நைட் ரைடர்ஸ் அணி 4 புள்ளிகள் பெற்று தரவரிசைப் பட்டியலில் இரண்டாமிடத்திற்கு முன்னேறியுள்ளது. இந்த போட்டியில் தோல்வியைக் கண்டதால் 4 புள்ளிகளுடன் ரன்ரேட் அடிப்படையில் மூன்றாமிடத்திற்கு சரிந்தது ராஜஸ்தான் ராயல்ஸ் அணி.

இன்று அபுதாபியில் உள்ள ஷேக் சையத் சர்வதேச கிரிக்கெட் ஸ்டேடியத்தில் நடைபெற உள்ள 13-வது தகுதிச்சுற்றுப் போட்டியில் கிங்ஸ் லெவன் பஞ்சாப் அணியும் மும்பை இந்தியன்ஸ் அணியும் மோதுகின்றன.

#IPL2020 #KKRvsRR #ஐபிஎல்2020

இரண்டு தோல்விகளுக்குப்பிறகு முதல் வெற்றியைப் பெற்ற சன்ரைஸர்ஸ் ஹைதராபாத்!

நேற்று அபுதாபியில் உள்ள ஷேக் சையத் கிரிக்கெட் ஸ்டேடியத்தில் நடைபெற்ற ஐபிஎல் 11-வது தகுதிச்சுற்று ஆட்டத்தில், டெல்லி கேபிடல்ஸ் அணியும் சன் ரைஸர்ஸ் ஹைதராபாத் அணியும் மோதின.

சன் ரைஸர்ஸ் ஹைதராபாத் அணியின் கேப்டனாக பொறுப்பேற்று, 100-வது போட்டியில் களமிறங்கினார் டேவிட் வார்னர். தொடர்ச்சியாக இரண்டு தோல்விகளை சந்தித்த ஹைதராபாத் அணி கட்டாயம் வெற்றி பெற்றே ஆக வேண்டும் என்ற நெருக்கடியில் களமிறங்க, தொடர்ச்சியாக இரண்டு வெற்றிகளைப் பெற்ற டெல்லி கேபிட்டல்ஸ் அணி உற்சாகத்தோடு களமிறங்கியது.

ஹைதரபாத் அணியில் இரண்டு மாற்றங்கள் செய்யப்பட்டன. கடந்த போட்டியில் விளையாடிய விரித்திமான் சாஹா, முகம்மது நபி ஆகியோருக்கு பதிலாக கேன் வில்லியம்ஸன், அப்துல் சமது ஆகியோர் ஆடும் லெவனில் இடம் பெற்றனர். அப்துல் சமது முதன் முதலில் இப்போட்டியில்தான் அறிமுக வீரராக களமிறங்குகிறார் என்பது குறிப்பிடத்தக்கது.

டெல்லி கேபிடல்ஸ் அணியில் ஆவேஷ் கானிற்கு பதிலாக காயத்திலிருந்து மீண்ட இஷாந்த் சர்மா சேர்க்கப்பட்டார். 

டாஸ் வென்ற டெல்லி கேபிடல்ஸ் அணியின் கேப்டனான ஸ்ரேயாஸ் ஐயர், இரவில் அதிக பனிப்பொழிவு இருக்கும் என்பதால், முதலில் ஹைதராபாத் அணியை பேட் செய்ய அழைத்தார்.

ஹைதரபாத் அணியின் தொடக்க ஆட்டக்காரர்களாக டேவிட் வார்னரும், ஜானி பேர்ஸ்டோவும் களமிறங்கினர்.

இருவரும் முதல் ஐந்து ஓவர்களில் நிதானமாகவே ஆடினர். மார்க்கஸ் ஸ்டோய்னிஸ் வீசிய நான்காவது ஓவரின் கடைசி பந்தில், காலில் வாங்கிய பேர்ஸ்டோ அதிர்ஷ்டவசமாக எல்.பி.டபிள்யூவிலிருந்து தப்பினார். அப்போது ஹைதராபாத் அணி 5 ஓவர் முடிவில் விக்கெட் இழப்பின்றி 24 ரன்கள் எடுத்திருந்தது.

ஆறாவது ஓவரை ஆன்ரிச் நோர்ட்ஜே வீச அந்த ஓவரில் டேவிட் வார்னர் ஒரு சிக்ஸர், ஒரு பவுண்டரியைப் பறக்கவிட்டார். பேட்டிங் பவர் பிளேவில், 6 ஓவர் முடிவில் ஹைதராபாத் அணி விக்கெட் இழப்பின்றி 38 ரன்கள் எடுத்திருந்தது.

ஒன்பதாவது ஓவரை அமித் மிஸ்ரா வீச, வீசிய முதல் பந்தை ரிவர்ஸ் ஸ்வீப் செய்ய, பேட்டில் பந்து  பட்டு, தேர்ட் மேன் திசையில் பவுண்டரியாக மாறியது. அடுத்த பந்தில் ரன் எடுக்கவில்லை. அதற்கு அடுத்த பந்தில் ரிவர்ஸ் ஸ்வீப் செய்ய பேட்டின் விளிம்பில் பட்டபந்து நேரே விக்கெட் கீப்பரான ரிஷப் பண்டிடம் தஞ்சமடைந்தது. அவுட் என்று ரிஷப் பண்டும், அமித் மிஸ்ராவும் நடுவரிடம் முறையிட்டனர். அவர் அவுட் கொடுக்க மறுக்கவே, டிஆர்எஸ் முறையில் ரிவியூ கேட்டனர். மூன்றாம் நடுவர் அதை அவுட் என்றார். டேவிட் வார்னர் 33 பந்துகளில் 2 சிக்ஸர்கள், 3 பவுண்டரிகள் உள்பட 45 ரன்களுடன் நடையைக் கட்டினார்.

அடுத்து வந்த மணீஷ் பாண்டே அமித் மிஸ்ராவின் வீசிய பந்தை டீப் மிட்விக்கெட் திசையில் தூக்கி அடிக்க, அந்த பந்து காகிசோ ரபடாவின் கையில் தஞ்சமடைய, அவர் 3 ரன்களில் நடையைக் கட்டினார்.

ஜானி பேர்ஸ்டோவுடன் கேன் வில்லியம்ஸன் ஜோடி சேர்ந்தார். 15 ஓவர் வரை இருவரும் நிதானமாகவே ஆடினர். 15 ஓவர் முடிவில் 2 விக்கெட் இழப்பிற்கு ஹைதராபாத் அணி 112 ரன்கள் எடுத்திருந்தது. பேர்ஸ்டோ 40 ரன்களும், வில்லியம்ஸன் 18 ரன்களும் எடுத்திருந்தனர்.

பேர்ஸ்டோ பந்துக்கு பந்து ரன் என்ற கணக்கில் நிதானமாக ஆடிக்கொண்டே வர, கேன் வில்லியம்ஸன் அதிரடியில் இறங்கினார். 16வது ஓவரிலும், 17வது ஓவரிலும் தலா இரண்டு பவுண்டரிகளை விளாசினார் வில்லியம்ஸன். 

ஜானி பேர்ஸ்டோ, காகிசோ ரபடா வீசிய 17.1 ஓவரில் தனது அரை சதத்தை எட்டினார். விரைவான அரை சதம் இல்லையென்றாலும், அணியின் எண்ணிக்கையை உயர்த்த இவரது அரை சதம் உதவியது. இதில் 2 பவுண்டரிகள், ஒரு சிக்ஸர் மட்டுமே அடங்கும். ரபடா வீசிய அதே ஓவரின் ஐந்தாவது பந்தினை மிட் ஆப் திசையில் பேர்ஸ்டோ தூக்கி அடிக்க, நோர்ட்ஜே அழகாக கேட்ச் பிடித்து அவரை வெளியேற்றினார்.

அடுத்த ஓவரை நோர்ட்ஜே வீச, இப்போட்டியில் அறிமுக வீரராக களமிறங்கிய அப்துல் சமது ஒரு சிக்ஸரையும், பவுண்டரியையும் விளாசி அணிக்கு நம்பிக்கை  ஏற்படுத்தினார்.

கடைசி ஓவரை ரபடா வீச, அவரது வேகப்பந்துவீச்சில், கேன் வில்லியம்ஸன் அக்ஷர் படேலிடம் கேட்ச் கொடுத்து வெளியேறினார். அவர் 26 பந்துகளில் 5 பவுண்டரிகள் உள்பட 41 ரன்கள் எடுத்திருந்தார்.

20 ஓவர் முடிவில் ஹைதராபாத் அணி 4 விக்கெட்டுகளை இழந்து 162 ரன்கள் எடுத்திருந்தது. அப்துல் சமது 12 ரன்களுடனும், அபிஷேக் சர்மா 1 ரன்னுடன் ஆட்டமிழக்காமல் இருந்தனர்.

163 ரன்கள் எடுத்தால் வெற்றி என்ற இலக்கோடு களமிறங்கிய டெல்லி கேபிடல்ஸ் அணிக்கு ஆரம்பத்திலேயே அதிர்ச்சி காத்துக்கொண்டிருந்தது.

புவனேஸ்குமார் வீசிய முதல் ஓவரிலேயே டெல்லி அணியின் தொடக்க ஆட்டக்காரரான பிரித்வி ஷா விக்கெட் கீப்பரான ஜானி பேர்ஸ்டோவிடம் கேட்ச் கொடுத்து வெளியேறினார். இவரையடுத்து ஷிகர் தவாணுடன் டெல்லி அணியின் கேப்டன் ஸ்ரேயாஸ் கைகோர்த்தார்.

ஷிகர் தவாண் அடித்து ஆட ஸ்ரேயாஸ் அவ்வப்போது ரன்களை எடுத்த வண்ணம் இருந்தார். பேட்டிங் பவர்பிளேவில், 6 ஓவர் முடிவில் டெல்லி அணி 1 விக்கெட்டை இழந்து 34 ரன்கள் எடுத்திருந்தது.

7வது ஓவரை சுழற்பந்து வீச்சாளர் ரஷீத் கானிடம் கொடுத்தார் டேவிட் வார்னர். அதற்கு கைமேல் பலன் கிடைத்தது. அந்த ஓவரின் இரண்டாவது பந்தில் ஸ்ரேயாஸ் ஐயர் 17 ரன்கள் எடுத்திருந்த நிலையில் அப்துல் சமதிடம் கேட்ச் கொடுத்து வெளியேறினார்.

இவரையடுத்து ஷிகர் தவாணுடன் ரிஷப் பண்ட் கைகோர்த்தார். டெல்லி அணியின் கட்டுக்கோப்பான பந்துவீச்சும், அற்புதமான பீல்டிங்கும் டெல்லி அணியை திணற வைத்தன.

தவாண் 34 ரன்கள் எடுத்திருந்தபோதும், ரிஷப் பண்ட் 28 ரன்கள் எடுத்திருந்த போதும், ரஷீத் கான் சுழலில் வீழ்ந்தனர். அடுத்தடுத்து வந்த வீரர்களும் சொற்ப ரன்களில் ஆட்டமிழந்தனர். 20 ஓவர் முடிவில் டெல்லி அணி 7 விக்கெட் இழப்பிற்கு 147 ரன்கள் மட்டுமே எடுத்ததால், ஹைதராபாத் அணி 15 ரன்கள் வித்தியாசத்தில் இந்த தொடரில் தனது முதல் வெற்றியைப் பதிவு செய்தது.

4 ஓவர்கள் வீசி, 14 ரன்கள் மட்டுமே விட்டுக்கொடுத்து 3 விக்கெட்டுகளை வீழ்த்திய ஹைதராபாத் அணியின் ரஷீத் கானிற்கு மேன் ஆப் தி மேட்ச் விருது வழங்கப்பட்டது.

தோல்விக்குப் பிறகு டெல்லி அணியின் கேப்டன் ஸ்ரேயாஸ் "பனிப்பொழிவு அதிக தாக்கத்தை ஏற்படுத்தும் என்ற எங்களின் கணிப்பு பொய்யாகிவிட்டது. டெல்லி அணி சிறப்பாக ஆடினார்கள். நாங்கள் இன்னும் நன்றாக விளையாடி இருக்க வேண்டும். 162 ரன்கள் என்பது எட்டிப்பிடித்திருக்க வேண்டிய இலக்குதான். அடுத்த போட்டியில் மீண்டு வருவோம்" என்றார்.

வெற்றிக்குப்பிறகு ஹைதராபாத் அணியின் கேப்டன் டேவிட் வார்னர் "இந்த தொடரில் முதல் வெற்றியைப் பதிவு செய்திருக்கிறோம். அதிக பவுண்டரிகளை அடிக்கவில்லை என்றாலும் ஓடி ஓடி ரன்களை எடுத்தோம். அந்த கடின உழைப்பிற்கு பலன் கிடைத்திருக்கிறது. எங்களது அணியின் வேகப்பந்து விச்சாளர் மிட்செல் மார்ஷ் காயமடைந்திருப்பது கவலை அளித்தது என்றாலும், அந்த இடத்தை இளம் பந்துவீச்சாளரான அபிஷேக் சர்மா நிரப்பிவிட்டார். ரஷீத்தின் சுழல் வீச்சு அணிக்கு பக்கபலமாக இருந்தது. எங்கள் அணிக்கு இப்போது நம்பிக்கை பிறந்துவிட்டது” என்றார்.

மோ.கணேசன்

#IPL2020 #DCvsSRH #ஐபிஎல்2020 #டெல்லி_கேபிடல்ஸ் #சன்ரைஸர்ஸ்_ஹைதராபாத்

201 ரன்கள் குவித்த பெங்களூரு – விரட்டிப்பிடித்த மும்பை இந்தியன்ஸ் – சூப்பர் ஓவரில் வெற்றி பெற்ற ராயல் சேலஞ்சர்ஸ்

மோ.கணேசன்

நேற்று, துபாய் இண்டர்நேஷனல் ஸ்டேடியத்தில் நடைபெற்ற ஐபிஎல் தொடரின், 1-0-வது தகுதிச் சுற்றுப் போட்டியில் மும்பை இந்தியன்ஸ் அணியும் ராயல் சேலஞ்சர்ஸ் பெங்களூரு அணியும் மோதின.

ஒரு வெற்றி ஒரு தோல்வியுடன் இருந்த ராயல் சேலஞ்சர்ஸ் இப்போட்டியில் நம்பிக்கையுடன் களமிறங்கியது. ஓரு தோல்வி, ஒரு வெற்றியுடன் இருந்த மும்பை இந்தியன்ஸ் அணியும் தன்னம்பிக்கையுடன் களமிறங்கியது.

கடந்த போட்டியில் மும்பை இந்தியன்ஸ் அணியில் விளையாடிய சவுரப் திவாரிக்கு பதிலாக இஷான் கிஸான் களமிறங்கினார். ராயல் சேலஞ்சர்ஸ் அணியில் மூன்று வீரர்கள் மாற்றப்பட்டிருந்தனர். கடந்த போட்டியில் அதிக ரன்களை விட்டுக்கொடுத்த டேல் ஸ்டெயின், உமேஷ் யாதவ் மற்றும் ஜோஷ் பிலிப்பே ஆகியோருக்கு பதிலாக குர்கிரீத் சிங், இஷ்ரு உதானா, ஆடம் ஸாம்பா ஆகியோர் களமிறங்கினர்.

டாஸ் வென்ற மும்பை இந்தியன்ஸ் அணியின் கேப்டனான ரோகித் சர்மா, பந்துவீச்சைத் தேர்வு செய்தார். டாஸில் தோற்ற பெங்களூரு அணி முதலில் பேட்டிங்கைத் தொடங்கியது.

பெங்களூரு அணியின் தொடக்க ஆட்டக்காரர்களாக தேவ்தத் படிக்கல் மற்றும் ஆரோன் பிஞ்சும் களமிறங்கினர். முதல் இரண்டு ஓவர்களில் நிதானம் காட்டிய ஆரோன் பிஞ்ச் மூன்றாவது ஓவரிலிருந்து அதிரடி காட்ட ஆரம்பித்தார். 2.2 ஓவரில் ஆரோன் பிஞ்ச் கொடுத்த கேட்ச்சை தவறவிட்டார் ரோஹித் சர்மா. அப்போது ஆரோன் பிஞ்ச் 9 ரன்கள் மட்டுமே எடுத்திருந்தார். அதற்கான விலையை மும்பை இந்தியன்ஸ் அணி கொடுத்தது.

ஒரு புறம் படிக்கல் நிதானமாக ஆட, மறுபுறம் வாண வேடிக்கை காட்டிய ஆரோன் பிஞ்ச் 31 பந்துகளில் 7 பவுண்டரிகள், ஒரு சிக்ஸருடன் அரை சதத்தை எட்டினார். 52 ரன்கள் எடுத்திருந்த போது ட்ரென்ட் போல்ட் பந்துவீச்சில் கிரென் பொல்லார்டிடம் கேட்ச் கொடுத்து ஆட்டமிழந்தார்.

படிக்கல்லுடன் விராட் கோலி ஜோடி சேர்ந்தார். வழக்கம்போல இம்முறையும் சொதப்பிய விராட் கோலி 11 பந்துகளில் 3 ரன்கள் மட்டுமே எடுத்து, தீபக் சஹாரின் சுழலில் மிக எளிதாக ரோஹித் சர்மாவிடம் கேட்ச் கொடுத்து வெளியேறினார்.

இவரையடுத்து படிக்கல்லுடன், 360 டிகிரி என்று செல்லமாக அழைக்கப்படும் ஏ.பி.டிவில்லியர்ஸ் ஜோடி சேர்ந்தார். அதுவரை நிதானமாக ஆடிய படிக்கல் அடித்து ஆட ஆரம்பிக்க, டிவில்லியர்ஸ் களமிறங்கியதிலிருந்தே அனைத்து பந்துகளையும் விரட்டி அடிக்க ஆரம்பித்தார்.

சிறப்பாக ஆடிய தேவ்தத் படிக்கல் 37 பந்துகளில் 5 பவுண்டரிகள் 2 சிக்ஸர்களுடன் ஐபிஎல் தொடரில் தனது இரண்டாவது அரை சதத்தைப் பதிவு செய்தார். அந்த மகிழ்ச்சி அதிக நேரம் நீடிக்கவில்லை 54 ரன்கள் எடுத்திருந்தபோது டிரென்ட் போல்ட் பந்துவீச்சில் பொல்லார்டின் அற்புதமான கேட்ச்சால் ஆட்டமிழந்தார். இவரையடுத்து டிவில்லியர்ஸுடன் ஷிவம் துபே கைகோர்த்தார்.

டிவில்லியர்ஸ் நாலா புறம் சிக்ஸரும் பவுண்டரிகளுமாகப் பறக்கவிட்டு, 23 பந்துகளில் 4 சிக்ஸர், 4 பவுண்டரிகளுடன் அரைசதத்தை எட்டினார். ஷிவம் துபே தனது பங்கிற்கு சிக்ஸர்களாகப் பறக்கவிட, பெங்களூரு அணி 20 ஓவர் முடிவில் 3 விக்கெட் இழப்பிற்கு 201 ரன்களைக் குவித்தது.

டிவில்லியர்ஸ் 55 ரன்களுடனும், ஷிவம் துபே 10 பந்துகளில் 3 சிக்ஸர்கள், 1 பவுண்டரி உள்பட 27 ரன்களுடனும் ஆட்டமிழக்காமல் இருந்தனர்.

இதனையடுத்து 202 ரன்கள் எடுத்தால் வெற்றி என்ற கடின இலக்குடன் பேட்டிங் செய்யத்தொடங்கியது மும்பை இந்தியன்ஸ் அணி.

அந்த அணியின் தொடக்க வீரர்களாக ரோஹித் சர்மாவும், குயின்டன் டிகாக்கும் களமிறங்கினர். இரண்டாவது ஓவரை சுழல்பந்து வீச்சாளரான வாஷிங்டன் சுந்தரிடம் பந்தைக் கொடுத்தார் விராட் கோலி. கேப்டனின் நம்பிக்கைக்கு கைமேல் பலன் கிடைத்தது.

வாஷிங்டன் சுந்தரின் சுழலில் 8 ரன்களக் எடுத்திருந்தபோது மாற்று வீரரான பவன் நேகியிடம் கேட்ச் கொடுத்து வெளியேறினார் ரோஹித் சர்மா. அடுத்து வந்த சூர்யகுமார் யாதவ், உதானா வீசிய முதல் பந்திலேயே விக்கெட் கீப்பரான டிவில்லியர்ஸிடம் கேட்ச் கொடுத்து டக் அவுட் ஆனார். குவின்டன் டிகாக்கும் நிலைக்கவில்லை. 14 ரன்கள் எடுத்திருந்தபோது சஹாலின் சுழலில் மாற்று வீரரான பவன் நேகியிடம் கேட்ச் கொடுத்து வெளியேறினார்.

6.4 ஓவரில் 3 விக்கெட்டுகளை இழந்து 39 ரன்கள் எடுத்து தடுமாறியது மும்பை இந்தியன்ஸ் அணி. இஷான் கிஸானுடன் கைகோர்த்த ஹர்திக் பாண்டியாவும் 13 பந்துகளில் 15 ரன்கள் எடுத்திருந்தபோது, ஆடம் ஸாம்பாவின் சுழற்பந்துவீச்சில் மாற்று வீரரான பவன் நேகியிடம் கேட்ச் கொடுத்து வெளியேறினார். அப்போது மும்பை அணி 11.2 ஓவர்களில் 4 விக்கெட்டுகளை இழந்து 78 ரன்கள் மட்டுமே எடுத்து தடுமாறிக்கொண்டிருந்தது. 52 பந்துகளில் 124 ரன்கள் எடுத்தாக வேண்டிய நிலை.

தொடக்க வீரர்களின் சொதப்பல்களால் மும்பை அணியில் நடுவரிசை ஆட்டக்காரர்களின்மீது அழுத்தம் அதிகரித்தது. இஷான் கிஸானுடன் அதிரடி வீரரான பொல்லார்ட் களமிறங்கினார். தொடக்கத்தில் நிதானமாக ஆடிய இஷான் கிஸான் அடுத்தடுத்து வாண வேடிக்கை காட்ட ஆரம்பித்தார். சிறப்பாக ஆடிய இஷான் கிஸான் 39 பந்துகளில் 4 சிக்ஸர்கள், 1 பவுண்டரியுடன் அரை சதத்தை எட்டினார். 14.3 ஓவரில் மும்பை அணி 100 ரன்களை எட்டியது.

33 பந்துகளில் 102 ரன்கள் எடுக்க வேண்டிய நிலை. மும்பை அணி தோல்வியை நோக்கி சென்றுகொண்டிருந்தபோது, இஷான் கிஸானும், பொல்லார்டும் சிக்ஸர்களாப் பறக்கவிட ஆரம்பித்தனர். பொல்லார்ட் 6 ரன்கள் எடுத்திருந்தபோது சஹாலின் சுழலில் படிக்கல்லிடம் கேட்ச் கொடுக்க அதை அவர் தவறவிட்டார். பொல்லார்ட் 15 ரன்கள் எடுத்திருந்தபோது ஸாம்பாவின் சுழலில் மீண்டும் தூக்கி அடிக்க, எல்லைக்கோட்டுக்கு அருகில் இருந்த பவன் நேகி கேட்ச் பிடிக்கத் தவறினார். இதற்கான விலையை பெங்களூரு அணி கொடுத்தது. அந்த ஓவரில் மட்டும் மூன்று சிக்ஸர்களைப் பறக்க விட்டார் பொல்லார்டு.

18 பந்துகளில் 58 ரன்கள் எடுத்தால் வெற்றி என்ற கடினமான நிலை இருந்தது. 17வது ஓவரை சஹால் வீச அந்த ஓவரில் மூன்று சிக்ஸர்களைப் பறக்கவிட்ட பொல்லார்டு, 20 பந்துகளில் 5 சிக்ஸர்கள், 2 பவுண்டரிகள் உள்பட அதிவேக அரைசதத்தைக் கடந்தார்.

12 பந்துகளில் 31 ரன்கள் தேவை என்ற நிலையில் 19வது ஓவரை நவ்தீப் ஷைனி வீசினார். அந்த ஓவரில் ஒரு சிக்ஸர் உள்பட 13 ரன்கள் கிடைக்க, 6 பந்துகளில் 19 ரன்கள் எடுத்தால் வெற்றி என்ற நிலை இருந்த்து.

கடைசி ஓவரை இஷ்ரு உதானா வீசினார். முதல் இரண்டு பந்துகளில் தலா ஒரு ரன்கள் எடுக்கப்பட, மூன்றாவது பந்தையும், நான்காவது பந்தையும் சிக்ஸருக்கு பறக்கவிட்டு பரவசப்படுத்தினார் இஷான் கிஸான். அடுத்த பந்தை டீப் மிட்விக்கெட் திசையில் தூக்கி அடிக்க துரதிர்ஷ்டவசமாக தேவ்தத் படிக்கல்லிடம் கேட்ச் கொடுத்து வெளியேறினார். அவர் 58 பந்துகளில் 9 சிக்ஸர்கள் ஒரு பவுண்டரி உள்பட 99 ரன்கள் எடுத்தார். ஆட்டத்தின் கடைசி பந்தில் 5 ரன்கள் எடுத்தால் வெற்றி என்ற நிலை. உதானா வீசிய பந்தை டீப் ஸ்கொயர் லெக் திசையில் தூக்கி அடிக்க, பவுண்டரியாக மாறியது. மும்பை அணி 20 ஓவர் முடிவில் 5 விக்கெட் இழப்பிற்கு 201 ரன்கள் எடுக்க ஆட்டம் டையில் முடிந்தது.

பெங்களூரு அணி சார்பில் 4 ஓவர் விசி 12 ரன்கள் மட்டுமே விட்டுக்கொடுத்து 1 விக்கெட்டையும் வீழ்த்தினார் வாஷிங்டன் சுந்தர். மற்ற பந்துவீச்சாளர்களான இஷ்ரு உதானா, நவ்தீப் சைனி, யஷ்வேந்திர சஹால், ஆடம் ஸாம்பா அனைவரும் ஒரு ஓவருக்கு 12 ரன்களுக்கும் மேல் விட்டுக்கொடுத்தனர்.

சூப்பர் ஓவர் முறையில் இரண்டாவதாக பேட் செய்த அணி முதலில் பேட்டிங் செய்யவேண்டும் என்பதால், பொல்லார்டும் ஹர்திக் பாண்டியாவும் களமிறங்கினர். நவ்தீப் சைனி வீசிய அந்த சூப்பர் ஓவரில் ஒரு விக்கெட்டை இழந்து மும்பை அணி 7 ரன்கள் மட்டுமே எடுத்தது. 8 ரன்கள் எடுத்தால் வெற்றி என்ற இலக்கோடு பெங்களூரு அணியில் டிவில்லியர்ஸும், விராட் கோலியும் களமிறங்கினர். பும்ரா வீசிய மூன்றாவது பந்தில் டிவில்லியர்ஸ் ஆட்டமிழந்த்தாக நடுவர் அறிவித்தார். டிஆர்எஸ் முறையில் நடுவரின் முடிவு திரும்பப்பெறப்படவே, 3 பந்துகளில் 6 ரன்கள் எடுத்தால் வெற்றி என்ற நிலை. ஆட்டத்தின் நான்காவது பந்தை பவுண்டரிக்கு விரட்டினார் டிவில்லியர்ஸ். அடுத்த பந்தில் ஒரு ரன் ஓடவே, மறுமுனைக்கு வந்த கோலி, கடைசி பந்தை பவுண்டரிக்கு விரட்டி அடித்து அணிக்கு வெற்றி தேடித்தந்தார்.

தோல்விக்குப் பிறகு ரோஹித் சர்மா “மிகச்சிறப்பான ஆட்டம். தொடக்கத்தில் நாங்கள் நன்றாக அடித்துவிளையாடி இருக்க வேண்டும். தொடக்க வீரர்கள் சரியாக விளையாடாமல் போனது ஏமாற்றம். இஷான் கிஸானின் ஆட்டம் பிரம்மிக்கும்படி இருந்தது. அவர் மீண்டும் பார்முக்குத் திரும்பியது எங்களுக்கு மகிழ்ச்சியே. பொல்லார்டும் பார்முக்கு வந்ததில் மகிழ்ச்சி. அவரின் அதிரடி அணிக்கு மிகப்பெரிய பலத்தைத் தந்தது. சூப்பர் ஓவரில் இஷான் கிஸானை இறக்கியிருக்காலம். ஆனால் அவர் சோர்ந்துபோய் இருந்தார். அதனால்தான் பொல்லார்டுடன் ஹர்திக்கை களமிறக்கினோம். சூப்பர் ஓவரில் 7 ரன்கள் போதாது என்றாலும், அதிர்ஷ்டமும் தேவை. அடுத்த போட்டியில் மீண்டு வருவோம்” என்றார்.

வெற்றிக்குப்பிறகு விராட் கோலி “இந்த போட்டியைக் குறித்து விவரிக்க வார்த்தைகளே இல்லை. எங்களது வீரர்கள் மிகச்சிறப்பாக பேட்டிங் செய்தனர். டிவில்லியர்ஸ் எங்களுக்க பலம். பந்துவீச்சில் வாஷிங்டன் சுந்தர் அற்புதமாக செயல்பட்டார். ஆடம் ஸாம்பா வீசிய கடைசி ஓவரைத் தவிர மிகச்சிறப்பாகவே பந்து வீசினார். பீல்டிங்கில் இன்னும் கவனம் செலுத்த வேண்டி இருக்கிறது. சூப்பர் ஓவரை பும்ரா வீசுவார் என்று தெரியும். சிறந்த பந்துவீச்சாளர். அவரது பந்துவீச்சில் பவுண்டரி அடித்தாலே வெற்றி கிடைக்கும் என்று யோசித்தே டிவில்லியர்சும் நானும் களமிறங்கினோம். அற்புதமான ஆட்டம். வெற்றிபெற்றது மகிழ்ச்சியைத் தருகிறது” என்றார்.

ஆட்டநாயகன் விருதை டிவில்லியர்ஸும், அதிக சிக்ஸ் அடித்த வீர்ர் விருதை இஷான் கிஸானும் பெற்றனர்.

மூன்று போட்டிகளில் விளையாடிய மும்பை அணி இரண்டு தோல்வி, ஒரு வெற்றியோடு 2 புள்ளிகளுடன் தரவரிசைப்பட்டியலில் 5-வது இடம் பிடித்துள்ளது. 2 வெற்றிகள், ஒரு தோல்வியுடன் 4 புள்ளிகள் பெற்று தரவரிசைப்பட்டியலில் 3-வது இடத்தைப் பிடித்துள்ளது பெங்களூரு அணி.

இன்று நடைபெறும் 11-வது தகுதிச்சுற்று ஆட்டத்தில் சன்ரைஸர்ஸ் ஹைதரபாத் அணி டெல்லி கேபிட்டல்ஸ் அணியை எதிர்கொள்ள இருக்கிறது.

#IPL2020 #MIvsRCB #ஐபிஎல்2020 #மும்பை_இந்தியன்ஸ் #ராயல்சேலஞ்சர்ஸ்_பெங்களூரு #சூப்பர்_ஓவர்

சன்ரைஸர்ஸ் ஹைதராபாத்தை வீழ்த்தியது கொல்கத்தா நைட் ரைடர்ஸ்!

நேற்று அபுதாபியில் உள்ள ஷேக் சையத் கிரிக்கெட் ஸ்டேடியத்தில் நடைபெற்ற, 8-வது தகுதிச் சுற்றுப் போட்டியில் கொல்கத்தா நைட் ரைடர்ஸ் அணி சன்ரைஸர்ஸ் ஹைதரபாத் அணியை எதிர்கொண்டது.

ராயல் சேலஞ்சர்ஸ் அணியுடன் மோதிய போட்டியில் தோல்வியைக் கண்டிருந்த சன்ரைஸர்ஸ் அணியும், மும்பை இந்தியன்ஸ் அணியுடன் மோதிய போட்டியில் தோல்வியைத் தழுவிய கொல்கத்தா அணியும் வெற்றி பெற வேண்டும் என்ற நோக்கத்தோடு களமிறங்கின.

டாஸ் வென்ற சன்ரைஸர்ஸ் ஹைதரபாத் அணியின் கேப்டன் டேவிட் வார்னர் பேட்டிங்கைத் தேர்வு செய்தார்.

சன்ரைஸர்ஸ் அணியில் முந்தைய போட்டியில் விளையாடிய மிட்செல் மார்ஷ், விஜய் சங்கர், சந்தீப் சர்மா ஆகியோருக்கு பதிலாக முகமது நபி, விரித்திமன் சாஹா, கலீல் அஹமது ஆகியோர் களமிறங்கினர். கொல்கத்தா அணி கடந்த போட்டியில் விளையாடிய நிகில் நாயக், சந்தீப் வார்ரியர் ஆகியோருக்கு பதிலாக கமலேஷ் நாகர்கோட்டி, வருண் சக்கரவர்த்தி ஆகிய வீர்ர்களோடு களமிறங்கியது.

சன்ரைஸர்ஸ் அணியின் தொடக்க ஆட்டக்கார்ர்களான டேவிட் வார்னரும், ஜானி பாரிஸ்டோவும் களமிறங்கினர். பேட் கம்மின்ஸின் அற்புதமான இன்ஸ்விங்கரில் 5 ரன்கள் எடுத்திருந்தபோது, தனது ஸ்டம்புகளைப் பறிகொடுத்தார் பாரிஸ்டோவ். அடுத்து களமிறங்கிய மணீஷ் பாண்டே வார்னருடன் இணைந்து மெல்ல மெல்ல அணியின் ஸ்கோரை உயர்த்தினார்.

நிதானமாக விளையாடிக் கொண்டிருந்த டேவிட் வார்னர் 30 பந்துகளில் 36 ரன்கள் எடுத்திருந்தபோது, வருண் சக்கரவர்த்தியின் சுழலில் அவரிடமே எளிதாக கேட்ச் கொடுத்து வெளியேறினார். அடுத்து மணீஷ் பாண்டேவுடன் விரித்திமன் சாஹா கைகோர்த்தார்.

இருவரும் நிதானமாகவும் தேவையானபோது அடித்தும் ஆடினர். சிறப்பாக ஆடிய பாண்டே அரை சதம் அடித்தார். 38 ரன்களில் 51 ரன்கள் எடுத்திருந்தபோது, ஆந்த்ரே ரஸ்ஸலின் பந்துவீச்சில் அவரிடமே கேட்ச் கொடுத்து வெளியேறினார். அவரது எண்ணிக்கையில் மூன்று பவுண்டரிகளும் இரண்டு சிக்ஸர்களும் அடங்கும்.

சாஹா 31 பந்துகளில் 30 ரன்கள் எடுத்திருந்தபோது ரன் அவுட் ஆனார். 20 ஓவர் முடிவில் சன்ரைஸர்ஸ் அணி 4 விக்கெட் இழப்பிற்கு 142 ரன்கள் எடுத்திருந்தது. முகமது நபி ஆட்டமிழக்காமல் 11 ரன்களுடனும், அபிஷேக் சர்மா 2 ரன்களுடனும் களத்தில் இருந்தனர்.

கொல்கத்தா அணியில் 7 வீரர்களை பந்துவீசப் பயன்படுத்திய தினேஷ் கார்த்திக், சன்ரைஸர்ஸ் அணியின் ரன் வேகத்தை திறமையாக கட்டுப்படுத்தினார். சிறப்பாக பந்துவீசிய பேட் கம்மின்ஸ் 4 ஓவரில் 19 ரன்கள் மட்டுமே கொடுத்து 1 விக்கெட்டை வீழ்த்தினார். விக்கெட்டுகளை அதிகம் வீழ்த்தவில்லை என்றாலும் எதிரணிக்கு ரன்களை வாரி வழங்காமல், பீல்டிங்கையும் சிறப்பாகச் செய்தது கொல்கத்தா அணி.

143 ரன்கள் எடுத்தால் வெற்றி என்ற இலக்குடன் களமிறங்கிய கொல்கத்தா அணி. அதன் தொடக்க ஆட்டக்காரர்களாக சுனில் நரைன், சுப்மன் கில் ஆகியோர் களமிறங்கினர்.

ரன் ஏதும் எடுக்காமல் சுனில் நரைன் நரைன் கலீல் அஹமது பந்துவீச்சில், வார்னரிடம் கேட்ச் கொடுத்து வெளியேறினார். சுப்மன் கில்லுடன் நிதீஷ் ராணா ஜோடி சேர்ந்தார். ஒருபுறம் சுப்மன் கில் நிதானமாக ஆட, நிதீஷ் ராணா 12 பந்துகளில் 6 பவுண்டரிகளை விளாசி எதிரணியை திணறடித்தார். ஆனால் அடுத்த பந்திலேயே நடராஜன் பந்துவீச்சில் விக்கெட் கீப்பரான சாஹாவிடம் கேட்ச் கொடுத்து வெளியேறினார்.

அடுத்து வந்த கேப்டன் தினேஷ் கார்த்திக், ரன் ஏதும் எடுக்காத நிலையில் ரஷீத் கானின் சுழலில் எல்.பி.டபிள்யூ முறையில் ஆட்டமிழந்தார். கில்லுடன் இயான் மோர்கன் கை கோர்த்தார். இருவரும் வாண வேடிக்கை காட்ட ஆரம்பித்தனர்.

18வது ஓவரின் முடிவில் கொல்கத்தா அணி 3 விக்கெட் இழப்பிற்கு 145 ரன்கள் சேர்த்து 7 விக்கெட் வித்தியாசத்தில் தனது முதல் வெற்றியை ருசித்த்து.

கடைசி வரை ஆட்டமிழக்காமல் இருந்த சுப்மன் கில், 62 பந்துகளில் 2 சிக்ஸர்கள். 5 பவுண்டரிகள் உள்பட 70 ரன்கள் குவித்தும், 29 பந்துகளில் மூன்று பவுண்டரிகள் 2 சிக்ஸர்கள் உள்பட 42 ரன்கள் குவித்த இயான் மோர்கனும் அணியின் வெற்றிக்கு உறுதுணையாக இருந்தனர்.

சிறப்பாக ஆடி வெற்றி பெற்ற கொல்கத்தா நைட் ரைடர்ஸ் அணி, தனது முதல் வெற்றியை பதிவு செய்து 2 புள்ளிகள் பெற்று தரவரிசைப் பட்டியலில் ஐந்தாமிடம் பிடித்துள்ளது. சன்ரைஸர்ஸ் ஹைதரபாத் அணி இரண்டு தோல்விகளுடன் புள்ளிப்பட்டியலில் கடைசி இடத்திற்கு தள்ளப்பட்டுள்ளது.

மேன் ஆப் தி மேட்ச் விருது கொல்கத்தா அணியின் சுப்மன் கில்லிற்கு வழங்கப்பட்டது.

தோல்விக்குப்பிறகு பேசிய டேவிட் வார்னர், “டாஸ் வென்றதும் பேட்டிங்கைத் தேர்வு செய்தது சரியான முடிவுதான். ஆனாலும் கொல்கத்தா அணியினர் பந்துவீச்சில் எங்களை கட்டுப்படுத்திவிட்டனர். பேட்டிங்கில் கூடுதல் கவனம் வேண்டும். பந்துவீச்சிலும் அதிக கவனம் செலுத்த வேண்டும். கூடுதலாக 30 முதல் 40 ரன்கள் எடுத்திருந்தால் ஆட்டம் எங்கள் பக்கம் திரும்பி இருக்கும்” என்றார்.

முதல் வெற்றிபெற்ற மகிழ்ச்சியில் கொல்கத்தா அணியின் கேப்டன் தினேஷ் கார்த்திக் “அனைத்து துறைகளிலும் கடினமாக உழைத்த்தற்கு பலன் கிடைத்திருக்கிறது. அணியில் ஆல்ரவுண்டர்கள் இருப்பது கூடுதல் பலம். இளம் வீரர்கள் அதிக உத்வேகத்துடன் பங்களித்திருக்கிறார்கள். கமலேஷ் நார்கோட்டி போன்ற இளம் வீர்ர்கள் அணிக்கு பலம். சுப்மன் கில் பேட்டிங்கின்போது எந்த வித அழுத்தமும் இன்றி சிறப்பாக ஆடி வெற்றியைத் தேடித் தந்தார். கேப்டனாக இருப்பதில் பெருமைப்பட்டாலும், எனது பேட்டிங்கில் நான் கவனம் செலுத்தவேண்டும். சிறப்பான வெற்றி” என்றார்.

இன்று நடைபெறும் ஆட்டத்தில் கிங்ஸ் லெவன் பஞ்சாப் அணியானது ராஜஸ்தான் ராயல்ஸ் அணியை, சார்ஜாவில் உள்ள சார்ஜா கிரிக்கெட் ஸ்டேடியத்தில் எதிர்கொள்ள இருக்கிறது.

-மோ.கணேசன் @ மோகனன்

#IPL2020 #KKRvsSRH